ءولى تابىلعان سپورتشى: اقتاۋلىق پوليتسەيلەردىڭ ءوزدەرىنە قارسى ءىس قوزعالدى

21 جاستاعى ۆالەريا شالنوۆانىڭ ءولىمى مەن ونىڭ زورلانعانى تۋرالى ماتەريالدار جيناعان پوليتسەيلەرگە قاتىستى قىلمىستىق ءىس قوزعالدى.

ولار «لاۋازىمدى وكىلەتتىگىن اسىرا پايدالاندى» دەپ كۇدىككە ءىلىندى. بۇل تۋرالى ماڭعىستاۋ وبلىستىق پروكۋراتۋراسىنىڭ باسپا ءسوز قىزمەتى وكىلدەرى مالىمدەدى، - دەپ حابارلايدى lada.kz.

ۆالەريا شالنوۆانىڭ ءولىمى تۋرالى ءىستى تەرگەپ جاتقان اقتاۋ پوليتسەيلەرى جاۋاپقا تارتىلۋى مۇمكىن. قۇقىق قورعاۋ ورگاندارى قىزمەتكەرلەرىنە «بيلىكتى نەمەسە لاۋازىمدىق وكىلەتتىكتەردى اسىرا پايدالانۋ»، ياعني 362-باپ بويىنشا قىلمىستىق ءىس جۇرگىزىلەدى.

سونىمەن قاتار، بۇعان دەيىن جابىرلەنۋشى تاراپتىڭ ادۆوكاتى اجار ءابدىل كەيبىر قۇقىق قورعاۋ ورگاندارىنىڭ قىزمەتكەرلەرى قىلمىستى جاسىرۋعا تىرىسىپ، ونى ۋاقىتىلى اشۋعا كەدەرگى تۋدىرعانىن ايتقان ەدى.

ەسكە سالايىق، ۆالەريا شالنوۆانىڭ ءمايىتى 2- شىلدەدە تاڭەرتەڭ اقتاۋ ىرگەسىندەگى سۋ جينالاتىن كانالدىڭ ماڭىنان تابىلعان بولاتىن. مارقۇمنىڭ تۋىستارى سۋيتسيد نۇسقاسىنا سەنبەدى. ولاردىڭ ايتۋىنشا، قىزدىڭ ولىمىنە كىنالى ادام بار، ول ۇستالعان.

ۆالەريا قويان-قولتىق ۇرىستان كاسىبي تۇردە جاتتىققان. ول كوپ جۇلدەگە يە بولىپ، سپورتتىق جارىستارعا قاتىسقان.

سونىمەن قاتار، كەيىنىرەك كۇدىكتى ۇستالعانى بەلگىلى بولدى.