ءتيىستى قىزمەتتەردىڭ جەر سىلكىنىسى كەزىندەگى ارەكەتتەر جوسپارىنا تۇزەتۋ ەنگىزىلەدى

استانا. KAZINFORM - سەيسميكالىق قاۋىپ بار ايماقتاردا ازاماتتىق قورعانىس قىزمەتتەرىنىڭ جۇمىسى كۇشەيتىلگەن رەجيمگە كوشىرىلەدى. ۇكىمەت وتىرىسىندا پرەمەر-مينيستر ءاليحان سمايىلوۆ وسىنداي تاپسىرما بەردى.

«ءوڭىر اكىمدىكتەرى مۇددەلى مەملەكەتتىك ورگاندارمەن بىرلەسىپ وسىنداي توتەنشە جاعدايلاردىڭ الدىن الۋ جانە سالدارىن جويۋ باعىتىنداعى ارەكەتتەر جوسپارىنا تۇزەتۋ ەنگىزسىن.

ازاماتتىق قورعانىس باسقارمالارى مەن كۇشتەرىنىڭ باسشىلارىنا، جاۋاپتى تۇلعالارعا باسقارۋ بەكەتتەرىندە جەدەل ارەكەت ەتۋ ماقساتىمەن ۋاقىتشا كەزەكشىلىك جۇرگىزۋ كەرەك. بۇل ءومىردى قامتاماسىز ەتۋگە جاۋاپتى ۇيىمداردىڭ بارىنە قاتىستى. ول ءۇشىن سەيسميكالىق قاۋىپ بار وڭىرلەردە ازاماتتىق قورعانىس جۇيەسىن كۇشەيتىلگەن دايىندىققا اۋىستىرۋ قاجەت. دەنساۋلىق ساقتاۋ مينيسترلىگى مەن الماتى اكىمدىگى زارداپ شەككەندەردى قاجەتتى ەممەن قامتاماسىز ەتۋى كەرەك»، - دەدى پرەمەر-مينيستر.

ۇكىمەت باسشىسى سەيسميكالىق احۋالدى ۇدايى باقىلاۋدا ۇستاۋ ءۇشىن كورشى ەلدەرمەن بىرلەسىپ ارەكەت ەتۋدى تاپسىردى.

«ت ج م قىزمەتتەرى احۋالدى باقىلاۋدا ۇستاسىن. قاجەتتى قىزمەتتەردىڭ، ونىڭ ىشىندە جەر سىلكىنىسىنىڭ ەپيتسەنترى بولعان كورشىلەس ەلدەردىڭ قىزمەتتەرىمەن دە ءوزارا ۇيلەسىمدى ارەكەتىن جولعا قويۋ قاجەت»، - دەدى ءاليحان سمايىلوۆ.

ەسكە سالايىق، بۇگىن، قاڭتاردىڭ 22 ىنەن 23 ىنە قاراعان ءتۇنى الماتىدا بىرنەشە تولقىنمەن جەر سىلكىندى.

رەسمي مالىمەت بويىنشا العاشقى ءدۇمپۋدىڭ امپليتۋداسى 5 بالعا دەيىن جەتكەن. سالدارىنان ۇرەي بوي الدىرعان تۇرعىنداردىڭ ءبىر بولىگى قالانى تاستاپ شىعۋعا بەكىنگەن. مۇنىڭ ارتى كولىك كەپتەلىسىنە ۇلاسىپ، جانارماي بەكەتتەرىندە كەزەك پايدا بولعان.

حالىق اراسىنداعى بايبالامدى پايدالانىپ تاكسي باعاسىن بىرنەشە ەسە كوتەرىپ جىبەرۋ فاكتىلەرى دە تىركەلدى.

ەپيسەنترى الماتىدان وڭتۇستىك-شىعىسقا قاراي 264 شاقىرىم جەردە، قىرعىزستان مەن قىتاي شەكاراسىندا ورنالاسقان تۇنگى جەر سىلكىنىسى الماتى مەن شىمكەنتتەن بولەك، استانادا جانە قازاقستاننىڭ بەس وبلىسىندا سەزىلگەن.

جەر سىلكىنىسى كەزىندە الماتى قالاسىندا 8 ادام زارداپ شەكتى، ءبىر تۇرعىنىڭ جاعدايى اۋىر. جاراقات العان ءۇش ادام تۇرعىن ۇيلەردىڭ 2 جانە 3-قاباتىنان سەكىرگەن.

24-25-قاڭتار كۇندەرى پرەزيدەنت قاسىم-جومارت توقايەۆ الماتىعا بارادى.

ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنبايەۆ الماتىدا جاقىن ۋاقىتتا جويقىن جەر سىلكىنىسى بولمايدى.

اۆتور

ەسىمجان ناقتىباي