ءتىل - دوستىقتىڭ التىن كوپىرى - ميلانا تاراسوۆا
كوكشەتاۋ. قازاقپارات - ءتىل - دوستىقتىڭ التىن كوپىرى، قاسيەتتى ۇعىم. ءار ازامات مەملەكەتتىك ءتىلىن مەڭگەرۋگە مىندەتتى. ەلىمىزدى الەمگە تانىتۋ ءۇشىن ءتىلىمىزدىڭ مارتەبەسىن كوتەرۋگە اتسالىسۋ - بورىشىمىز.
بۇل تۋرالى قازاقستان حالقى اقمولا اسسامبلەياسى جانىنداعى «قوعامدىق كەلىسىم» م م-نىڭ «مامىلە» مەملەكەتتىك ءتىلدى مەڭگەرۋ كلۋبىنىڭ جەتەكشىسى ميلانا تاراسوۆا ايتتى.
بۇگىنگى كۇنى ميلانا كوكشەتاۋداعى ش. ءۋاليحانوۆ اتىنداعى ۋنيۆەرسيتەتىنىڭ 4-كۋرس ستۋدەنتى، قازاق ءتىلى مەن ادەبيەتى ءپانىنىڭ مۇعالىمى ماماندىعى بويىنشا ءبىلىم الىپ جاتىر. ول نەگىزگى وقۋىنان بولەك، وبلىس ورتالىعىنداعى «قوعامدىق كەلىسىم» مەكەمەسىنىڭ جانىنداعى مەملەكەتتىك ءتىلدى ناسيحاتتاۋ جانە دامىتۋ ورتالىعىنىڭ «مامىلە» مەملەكەتتىك ءتىلدى مەڭگەرۋ كلۋبىنا جەتەكشىلىك ەتەدى. ونىڭ قازاق تىلىنە دەگەن ماحاباتى ءومىرىن وزگەرتىپ، ماقساتىنا جەتەلەگەن.
«جاستايىمنان مۇعالىم بولۋدى ارماندادىم. مەكتەپتە وقىپ جۇرگەنىمدە ءوزىمنىڭ سىنىپتاستارىما قازاق تىلىنەن كومەكتەسىپ، ۇيرەتتىم. قازاق تىلىنە دەگەن ماحاباتىم ەرەكشە بولدى. سول ارمان مەن تىلگە دەگەن ماحاباتىم مەنى اداستىرماي، پەداگوگيكا سالاسىنا الىپ كەلدى. وسى ماقساتتا كوكشەتاۋدا جوعارى وقۋ ورنىنا «قازاق ءتىلى مەن ادەبيەتى» ماماندىعى بويىنشا وقۋعا ءتۇستىم. قازىرگى كەزدە، ۋنيۆەرسيتەتتەگى وقۋىمنان بولەك، «قوعامدىق كەلىسىم» مەكەمەسىنىڭ جانىنداعى مەملەكەتتىك ءتىلدى ناسيحاتتاۋ جانە دامىتۋ ورتالىعىندا «مامىلە» مەملەكەتتىك ءتىلدى مەڭگەرۋ كلۋبىنا جەتەكشىلىك ەتەمىن. وندا وزگە ۇلت وكىلدەرىنە مەملەكەتتىك تىلدە ساباق بەرەمىن. ءتىل - دوستىقتىڭ التىن كوپىرى، قاسيەتتى ۇعىم. ءار ازامات مەملەكەتتىك ءتىلىن مەڭگەرۋگە مىندەتتى دەپ ەسەپتەيمىن. ال ەلىمىزدى الەمگە تانىتۋ ءۇشىن ءتىلىمىزدىڭ مارتەبەسىن كوتەرۋگە اتسالىسۋ - ول ءبىزدىڭ بورىشىمىز»، - دەيدى ميلانا تاراسوۆا.
«مامىلە» مەملەكەتتىك ءتىلدى مەڭگەرۋ كلۋبى ءوز جۇمىسىن ءبىر جىلدان استام ۋاقىت بۇرىن باستاعان، وسى قىسقا ۋاقىتتىڭ ىشىندە ءتۇرلى ەتنوس وكىلدەرىنە مەملەكەتتىك ءتىلدى مەڭگەرۋگە كومەكتەسىپ كەلەدى. ءار اپتانىڭ سەنبى كۇنى وتكىزىلىپ تۇراتىن ساباقتار تىلدىك كەدەرگىنى، ەكپىندى جويۋعا، سوزدىك قورىن كەڭەيتۋگە، سويلەۋدى دامىتۋعا ىقپال ەتەتىن ءارتۇرلى جاتتىعۋلار مەن تاپسىرمالاردى قامتيدى. ميلانانىڭ مەملەكەتتىك ءتىلدى وقىتۋ ادىستەمەسى ەڭ الدىمەن تىڭداۋشىلاردىڭ اۋىزەكى سويلەۋىن دامىتۋعا، قازاق حالقىنىڭ ادەپ-عۇرىپتارىن، سالت-داستۇرلەرىن، مەنتاليتەتى مەن قۇندىلىقتار جۇيەسىن ءبىلۋ پريزماسى ارقىلى قازاق ءتىلىن ۇيرەنۋگە باعىتتالعان.
«كلۋب اشقانداعى ماقساتىمىز - مەملەكەتتىك ءتىلدى ىلگەرىلەتۋ، دامىتۋ، كوممۋنيكاتيۆتىك داعدىلاردى قالىپتاستىرۋ، ءتىل ۇيرەنۋشىلەردىڭ اۋىزەكى سويلەۋىن جەتىلدىرۋ. ءارتۇرلى جاستاعى تىڭداۋشىلارمەن ءارتۇرلى فورماتتاعى ديالوگتار جاسايمىز. قازىرگى ۋاقىتتا 70 تىڭداۋشىمىز بار، قازاق ءتىلىن ۇيرەنگىسى كەلەتىندەر سانى كۇن ساناپ ارتىپ كەلەدى. كەيبىر شاكىرتتەرىم جۇمىستا جانە كۇندەلىكتى ومىردە مەملەكەتتىك تىلدە ەركىن سويلەۋگە مۇمكىندىك بەرەتىن دەڭگەيگە جەتتى. ءبىزدىڭ كلۋبتا قازاق تىلىندە سويلەيتىندەردىڭ سانىن ارتتىرۋعا باعىتتالعان جۇمىس جالعاسۋدا، - دەپ قوستى ميلانا اناتوليەۆنا.
وسى كۇنى ميلانانىڭ شاكىرتتەرى وبلىستىق، رەسپۋبليكالىق بايقاۋلاردا جۇلدە الىپ ءجۇر. سونىڭ ءبىرى ماۋل گلەب رەسپۋبليكالىق «مىڭبۇلاق» بايقۋىندا 1-ورىن السا، نادەجدا سيدوروۆيچ «قازاقشا سويلە» اكسياسىنىڭ جەڭىمپازى اتاندى. ال يۋليا سۋروۆيتسكايا وڭىرلىك قازاق ءتىلدى ءىس-شارالاردا شەشەندىك تانىتۋدا.
سونىمەن بىرگە، ميلانا قازاقستان حالقى اقمولا اسسامبلەياسىنىڭ قوعامدىق جۇمىستارىنا دا اتسالىسىپ كەلەدى.
ايتا كەتسەك، بۇدان بۇرىن اقمولا وبلىسىندا مامىر مەرەكەلەرى قالاي وتەتىنىن جازعان ەدىك.
اۆتور
اسلان وسپانوۆ
