ءتورت وبلىستا قاتتى ىستىق بولادى - قازگيدرومەت

استانا. KAZINFORM - قازاقستاننىڭ باسىم بولىگىندە اتموسفەرالىق اعىنداردىڭ وتۋىنە بايلانىستى نايزاعاي ويناپ، جاڭبىر، بۇرشاق جاۋادى، داۋىل تۇرىپ، ەلىمىزدىڭ سولتۇستىگى مەن شىعىسىندا، ورتالىعىندا قاتتى جاڭبىر جاۋادى.

رەسپۋبليكا بويىنشا جەل كۇشەيىپ، سولتۇستىكتە، ورتالىعىندا، شىعىسىندا تۇنگى جانە تاڭەرتەڭگى ساعاتتاردا تۇمان تۇسەدى.

كۇندىز باتىس قازاقستان، اتىراۋ، ماڭعىستاۋ وبلىستارىندا، اقتوبە وبلىسىنىڭ باتىسىندا قاتتى ىستىق ساقتالادى.

ماڭعىستاۋ وبلىسىندا، اتىراۋ وبلىسىنىڭ باتىسىندا، شىعىسىندا، ورتالىعىندا، باتىس قازاقستان وبلىسىنىڭ سولتۇستىك- باتىسىندا، وڭتۇستىگىندە، الماتى وبلىسىنىڭ وڭتۇستىگىندە، باتىسىندا، جەتىسۋ وبلىسىنىڭ سولتۇستىگىندە، شىعىسىندا جوعارى ءورت قاۋپى ساقتالادى.

تۇركىستان، قىزىلوردا، جامبىل، ۇلىتاۋ وبلىستارىندا، جەتىسۋ وبلىسىنىڭ سولتۇستىگىندە، شىعىسىندا، قوستاناي، قاراعاندى وبلىستارىنىڭ وڭتۇستىگىندە، اتىراۋ وبلىسىنىڭ وڭتۇستىك- شىعىسىندا، ماڭعىستاۋ وبلىسىنىڭ باتىسىندا توتەنشە ءورت قاۋپى ساقتالادى.