ءتورت جولاقتى جول كوبەيسە، تەحنيكانى دا كوبەيتۋ كەرەك - مينيستر قارابايەۆ
«قازاۆتوجول» ۇلتتىق كومپانياسى جولداردى قىستا كۇتىپ ۇستاۋ ءۇشىن 142 مىڭ تەكشە مەتر قۇم جانە 25 مىڭ توننا تەحنيكالىق تۇز ازىرلەدى. بۇل تۋرالى كولىك ءمينيسترى مارات قارابايەۆ ءمالىم ەتتى، دەپ حابارلايدى Kazinform.
ءمينيستردىڭ ايتۋىنشا، قازىرگى ۋاقىتتا «قازاۆتوجول» ۇلتتىق كومپانياسىنىڭ بارلىق كۇشى جولداردى قىس مەزگىلىنە دايىنداۋعا باعىتتالعان. جولداردى قىستا كۇتىپ ۇستاۋ ءۇشىن 142 مىڭ تەكشە مەتر قۇم جانە 25 مىڭ توننا تەحنيكالىق تۇز ازىرلەنگەن.
«ۇلتتىق وپەراتور 1870 قىسقى تەحنيكانى جۇمىلدىردى، ونىڭ ىشىندە 493 ىن مەردىگەر ۇيىمدار دايىنداسا، 218 ى جالعا الىندى. سوڭعى جىلدارى 4 جولاقتى جولدار كوبەيۋدە، بۇل ءوز كەزەگىندە جول-پايدالانۋ تەحنيكاسىنىڭ سانىن ارتتىرۋدى تالاپ ەتەدى. وسى قاجەتتىلىكتى شەشۋ ءۇشىن «قازاۆتوجول» بيىل قوسىمشا 379 تەحنيكا ساتىپ الۋدا، ونىڭ 245 ى ونەركاسىپتى دامىتۋ قورى ارقىلى، 25 ى جول ءجۇرۋ اقىسىنان جانە 109 ى - امورتيزاتسيالىق اۋدارىمدار ەسەبىنەن الىنادى»، - دەدى مارات قارابايەۆ ۇكىمەتتىڭ بۇگىنگى وتىرىسىندا.
دەگەنمەن، ءالى دە 1100 دەن استام تەحنيكا جەتىسپەيدى. سوندىقتان كولىك ءمينيسترى ونەركاسىپتى دامىتۋ قورىنان جەڭىلدەتىلگەن نەسيە الۋ ارقىلى تەحنيكالاردى تولىقتىرۋ جۇمىستارى جالعاساتىنىن جەتكىزدى.
ايتا كەتەيىك، بيىل قازاقستان بويىنشا 10700 شاقىرىم جولعا قۇرىلىس-مونتاج جۇمىستارى جۇرگىزىلەدى. ناتيجەسىندە نورماتيۆتىك جاعدايداعى جولدار رەسپۋبليكالىق جەلىدە - 92 پايىزعا، جەرگىلىكتى جەلىدە 87 پايىزعا دەيىن جەتپەك.
حالىقتىڭ شاعىمدارىن ەسكەرە وتىرىپ، وسى جىلى بارلىق كۇش قۇرىلىسى ۇزاققا سوزىلعان 6 نەگىزگى جوباعا باعىتتالدى. بۇل تالدىقورعان - وسكەمەن، قاراعاندى - الماتى، مەركە - بۋرىلبايتال، اقتوبە - قاندىاعاش جانە اتىراۋ - استراحان جولدارى.
