ءتورت جاڭا ەسىم - بەكتەنوۆتىڭ كابينەتى قالاي جاساقتالدى
استانا. KAZINFORM - پرەمەر-مينيستر لاۋازىمىنا كىرىسكەن ولجاس بەكتەنوۆتىڭ ورنىنا ايبەك دادەبايەۆ پرەزيدەنت اكىمشىلىگىنىڭ باسشىسى بولىپ تاعايىندالدى. كەشكە قاراي و. بەكتەنوۆ باسقاراتىن مينيسترلەر كابينەتىنىڭ قۇرامى دا بەلگىلى بولدى. Kazinform جاڭا ۇكىمەتتىڭ قۇرامىنا شولۋ جاساپ كوردى. اڭگىمەنى ءتورت جاڭا ەسىمنەن باستايىق.
«بايتەرەكتەن» ۇلتتىق ەكونوميكاعا
48 جاستاعى نۇرلان بايبازاروۆ ۇلتتىق ەكونوميكا ءمينيسترى بولعان الىبەك قۋانتىروۆتىڭ ورنىنا جايعاستى. بۇگىنگە دەيىن «بايتەرەك» ۇلتتىق باسقارۋشى حولدينگىن باسقارعان ول قىزمەتتەگى 23 جىلىنىڭ كوبىن كۆازيمەملەكەتتىك سەكتوردا وتكەرگەن. «قازاقستاننىڭ دامۋ بانكى»، «قازاقستان تەمىر جولى»، «قازمۇنايگاز»، «ونەركاسىپتى دامىتۋ قورى» كومپانيالارىندا جۇمىس ىستەگەن نۇرلان بايبازاروۆ ەكس-مينيستر ءا. قۋانتىروۆتىڭ قوسىلعان قۇن سالىعىن تولەيتىن تۇلعالاردىڭ قاتارىن كەڭەيتۋ ارقىلى بيۋدجەت تاپشىلىعىن جويۋ تۋرالى باستاماسىن نە ىستەيتىنى قىزىق.
ءماجىلىس كوميتەتىنەن قارجى مينيسترلىگىنە
نۇرلان بايبازاروۆ مينيسترلىك لاۋازىمىمەن قاتار پرەمەر-ءمينيستردىڭ ورىنباسارى قىزمەتىن قاتار الىپ جۇرەدى. بۇل مىندەت وعان قارجى ءمينيسترى بولعان ەرۇلان جاماۋبايەۆتان قالدى دەپ توپشىلاۋعا بولادى. ولاي دەيتىنىمىز، ونىڭ ورنىنا كەلگەن ءمادي تاكيەۆ تەك مينيسترلىك لاۋازىمىن اتقارادى.
ەڭبەك جولىن ەسەپشىلىكتەن باستاعان ءمادي توكەش ۇلى 1-ساۋىردە 46 عا تولادى. سالىق ورگاندارىندا ءتۇرلى لاۋازىمدار اتقارعان ول 2019-2020 -جىلدارى ق ر ۇلتتىق ەكونوميكا ۆيتسە- ءمينيسترى بولسا، 2020-2023 -جىلدارى پرەزيدەنت اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمىنىڭ مەڭگەرۋشىسى رەتىندە جۇمىس ىستەدى. 2023 -جىلعى ناۋرىزدان باستاپ ءماجىلىستىڭ قارجى جانە بيۋدجەت كوميتەتىنىڭ ءتوراعاسى بولىپ جۇمىس ىستەپ كەلدى.
پرەزيدەنت كۇزەتىنەن ت ج م-گە
سىرىم ءشارىپحانوۆتىڭ ورنىنا كەلگەن توتەنشە جاعدايلار ءمينيسترى شىڭعىس ءارىنوۆ 2006 -جىلدان 2022 -جىلعا دەيىن مەملەكەتتىك كۇزەت قىزمەتىندە ءتۇرلى ساتىدان ءوتىپ، شىڭدالعان. 40 جاستاعى جاڭا مينيستر 2022 -جىلدىڭ قاڭتارىنان بۇگىنگە دەيىن قازاقستان رەسپۋبليكاسى پرەزيدەنتىنىڭ وكىمىمەن قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى - پرەزيدەنت كۇزەت قىزمەتىنىڭ باستىعى بولىپ كەلدى.
دەپۋتاتتىقتان دەنساۋلىق ساقتاۋ مينيسترلىگىنە
ءا. سماليوۆ كابينەتىندەگى ءۇش ايەل ءمينيستردىڭ ءبىرى بولعان اجار عينيات قىزمەتىمەن قوشتاسقانىمەن، ورنىن تاعى بۇرىمدى باستى. ول - سەنات دەپۋتاتى اقمارال ءالنازاروۆا.
52 جاستاعى ا. ءالنازاروۆا - مەديتسينا عىلىمدارىنىڭ دوكتورى. پەدياتر مامان قىزىلوردا وبلىسىنىڭ دەنساۋلىق ساقتاۋ سالاسىندا باسشىلىق قىزمەتتەر اتقارىپ، جەرگىلىكتى ءماسليحات دەپۋتاتى بولدى. سەناتتاعى دەپۋتاتتىق مانداتىندا دا دەنساۋلىق سالاسىنىڭ وزەكتى پروبلەمالارىن كوتەرۋمەن ەستە قالدى.
تاعى ءبىر مۇمكىندىك بەرىلگەندەر
مەملەكەت باسشىسىنىڭ جارلىقتارىمەن كەلەسى لاۋازىم يەلەرى بۇرىنعى ورىندارىندا قالدى:
37 جاستاعى كولىك ءمينيسترى مارات قارابايەۆ،
54 جاستاعى تۋريزم جانە سپورت ءمينيسترى ەرمەك مارجىقپايەۆ،
49 جاستاعى مادەنيەت جانە اقپارات ءمينيسترى ايدا بالايەۆا،
56 جاستاعى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ،
42 جاستاعى عىلىم جانە جوعارى ءبىلىم ءمينيسترى ساياسات نۇربەك،
62 جاستاعى ەكولوگيا جانە تابيعي رەسۋرستار ءمينيسترى ەرلان نىسانبايەۆ،
54 جاستاعى وقۋ-اعارتۋ ءمينيسترى عاني بەيسەمبايەۆ،
40 جاستاعى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين،
57 جاستاعى اۋىل شارۋاشىلىعى ءمينيسترى ايداربەك ساپاروۆ،
53 جاستاعى ەنەرگەتيكا ءمينيسترى الماسادام ساتقاليەۆ،
46 جاستاعى ساۋدا جانە ينتەگراتسيا ءمينيسترى ارمان شاققاليەۆ،
42 جاستاعى ونەركاسىپ جانە قۇرىلىس ءمينيسترى قانات شارلاپايەۆ،
55 جاستاعى ەڭبەك جانە حالىقتى الەۋمەتتىك قورعاۋ ءمينيسترى، سۆەتلانا جاقىپوۆا،
44 جاستاعى ادىلەت ءمينيسترى ازامات ەسقارايەۆ.
21 ءمينيستردىڭ ۇشەۋى - ايەل
سونداي-اق كونستيتۋتسيا بويىنشا پرەزيدەنت ءوز بەتىمەن تاعايىندايتىن ءۇش مينيستر دە ورىندارىن ساقتاپ قالدى. اتاپ ايتساق:
مۇرات نۇرتىلەۋ قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى لاۋازىمىنا،
ەرجان سادەنوۆ قازاقستان رەسپۋبليكاسىنىڭ ىشكى ىستەر ءمينيسترى لاۋازىمىنا،
رۋسلان جاقسىلىقوۆ قورعانىس ءمينيسترى لاۋازىمىنا قايتا تاعايىندالدى.
بۇرىنعى قارجى ءمينيسترى ەرۇلان جاماۋبايەۆتان باسقا ۆيتسە-پرەمەرلەر دە قىزمەتىندە قالدى.
جاڭا كابينەتتىڭ جاسىنا كەلسەك، ەڭ جاس مينيستر كولىك ءمينيسترى مارات قارابايەۆ بولىپ تۇر. ال ەڭ ەگدە جاستاعى ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ زەينەت جاسىنا جەتۋىنە ءبىر جىلداي عانا ۋاقىت قالعان.
جالپى مينيسترلەر كابيەنتىندەگى 21 ءمينيستردىڭ ۇشەۋى - ايەل.
ايتا كەتەيىك، كەشە مەملەكەت باسشىسى «قازاقستان رەسپۋبليكاسىنىڭ ۇكىمەتى تۋرالى» جارلىققا قول قويدى.
پرەزيدەنت كەڭەسشىسى - باسپا ءسوز حاتشىسى بەرىك ءۋالي ۇكىمەت باسشىسىن تاعايىنداۋ ءراسىمى جونىندە پىكىر ءبىلدىردى.
مەملەكەت باسشىسىنا «Amanat» پارتياسىنىڭ اتىنان پرەمەر-ءمينيستردىڭ كانديداتۋراسى ۇسىنىلدى.
پرەزيدەنت پارلامەنتتەگى پارتيا فراكسيالارىنىڭ جەتەكشىلەرىمەن كەزدەستى.
ءماجىلىس دەپۋتاتتارى پرەمەر-مينيستر لاۋازىمىنا ولجاس اباي ۇلى بەكتەنوۆتى تاعايىنداۋعا كەلىسىم بەردى.
اۆتور
ەسىمجان ناقتىباي
