ءتولقۇجاتتى تەگىن الاتىن ازاماتتاردىڭ 9 ساناتى
استانا. KAZINFORM - شەتەلگە شىققىسى كەلەتىن كەي قازاقستاندىقتار مەملەكەتتىك ءتولقۇجاتتى تەگىن الا الادى. ماسەلەن، بىلتىر 102 مىڭ ازامات پاسپورت الۋ ءۇشىن تولەنەتىن باج سالىعىنان بوساتىلعان.
ءى ءى م كوشى- قون قىزمەتى كوميتەتى حالىقتى قۇجاتتاندىرۋ باسقارماسىنىڭ اعا ينسپەكتورى اينۇر بايگەلەنوۆانىڭ ايتۋىنشا، مەملەكەتتىك قۇجاتتى الۋ ءۇشىن باج سالىعىن تولەمەيتىن ازاماتتاردىڭ ساناتى بار.
سالىق كودەكسىنىڭ 622-بابىنا سايكەس:
ۇ و س ارداگەرلەرى مەن ولارعا تەڭەستىرىلگەن تۇلعالار
كەڭەس وداعىنىڭ باتىرلارى
سوتسياليستىك ەڭبەك ەرلەرى
مۇگەدەكتىگى بار ازاماتتار (بارلىق توپ)
بالا كەزىنەن مۇگەدەك بولعان ازاماتتىڭ اتا-اناسىنىڭ ءبىرى
قارتتار مەن مۇگەدەكتەرگە ارنالعان مەكەمەلەردە تۇراتىن ەگدە جاستاعى ادامدار
جەتىم بالالار جانە بالالار ۇيلەرىندە نەمەسە ينتەرناتتاردا تۇراتىن اتا- اناسىنىڭ قامقورلىعىنسىز قالعان بالالار
«باتىر انا»، «التىن القا» جانە «كۇمىس القا» توسبەلگىلەرىنىڭ يەلەرى
چەرنوبىل اپاتىنىڭ سالدارىنان زارداپ شەككەن ازاماتتارعا ءتولقۇجات تەگىن بەرىلەدى.
- ىشكى ىستەر مينيسترلىگىنىڭ 2020 -جىلعى 30 - ناۋرىزدا بەكىتىلگەن 267 بۇيرىعى بار. سوندا تولىعىمەن جازىلعان. مۇگەدەكتىگى بار بالا بولسا، ول ءوزى تۇراتىن وڭىردەگى حالىققا قىزمەت كورسەتۋ ورتالىعىنا بارادى. تيىسىنشە بالانىڭ تۋۋ تۋرالى كۋالىگىن اتا-انالارىنىڭ بىرەۋى كورسەتە وتىرىپ، ارىز جازادى. ال چەرنوبىل اپاتىنان زارداپ شەككەن، ۇ و س قاتىسقان ازاماتتار ارنايى كۋالىكتەرىن كورسەتىپ، تەگىن الا الادى، - دەدى اينۇر بايگەلەنوۆا Kazinform اگەنتتىگىنە بەرگەن سۇحباتىندا.
دەمەك، كەز كەلگەن قازاقستاندىق ءوزىنىڭ بەلگىلى ءبىر ساناتقا جاتاتىنىن قۇجات جۇزىندە دالەلدەسە جەتكىلىكتى. ءتولقۇجات ءوتىنىش قابىلدانعاننان كەيىن 15 جۇمىس كۇنى ىشىندە دايىن بولادى. الايدا مۇنداي ازاماتتار قۇجاتتى جەدەل العىسى كەلسە، اقى تولەۋى كەرەك.
- ءبىراق جەدەلدەتىلگەن پاسپورتقا باج سالىعى سالىنادى، ياعني ول شامامەن 1,5-3 مىڭ تەڭگەنىڭ ارالىعىندا بولادى. سونىمەن قاتار جەدەلدەتىلگەن ءتولقۇجات استانا، الماتى، شىمكەنت، اقتوبە قالالارىندا 1-3 كۇندە دايىن بولسا، باسقا رەسپۋبليكالىق ماڭىزى بار قالالاردا 3-5 كۇن الادى. ول پوشتانىڭ جەتكىزۋ مەرزىمىنە بايلانىستى، - دەيدى كوميتەت وكىلى.
