ءسىز كەلگەلى ءيت تە، قوقىس تا قاپتادى، جارىق تا جوق - الماتىداعى اۋدان تۇرعىنى ەربولات دوسايەۆقا تالاپ قويدى

الماتى. KAZINFORM - الماتىعا ەربولات دوسايەۆ اكىم بولىپ كەلگەلى قالادا ءارتۇرلى ماسەلە كوبەيگەن. بۇل تۋرالى ەربولات دوسايەۆتىڭ تۇركسىب اۋدانىنىڭ تۇرعىندارىمەن كەزدەسۋ كەزىندە نۇرلان ەسىمدى قالا تۇرعىنى ايتتى.

تۇرعىننىڭ ايتۋىنشا، ماسەلەلەر ازايعاننىڭ ورنىنا، كوبەيىپ كەلەدى.

«ماسەلەلەردىڭ شەشىلىپ جاتقانىن كورمەپپىن. مەن «پياتيلەتكا» شاعىن اۋدانىندا تۇرامىن. وندا، مىنە، 6 اي بولدى، ەكى كارىز قۇدىعىنىڭ قاقپاعى جابىلماي جاتىر. بۇل جەردە ءسىز قىزمەتكەرلەرىڭىزدى نە جۇمىس ىستەتە المايسىز، نە ولار جۇمىس ىستەمەيدى. ەگەر ولارعا جۇمىس ىستەتە الماساڭىز، ورنىڭىزدى بوساتىڭىز. ءسىز كەلگەلى ءيت تە قاپتادى، قوقىس تا قاپتادى، جارىق تا جوق، قىسقاسى تارتىپسىزدىك بەلەڭ الىپ بارا جاتىر. جۇمىس ىستەتۋ كەرەك. كوپ نارسە ءسىزدىڭ قۇزىرەتىڭىزدە عوي»، - دەدى قالا تۇرعىنى.

ءوز كەزەگىندە ەربولات دوسايەۆ تۇركسىب اۋدانىندا كوپ جۇمىس ءجۇرىپ جاتقانىن اتاپ ءوتتى.

«راس، ءبىر جەردە ۇلگەرەمىز، ءبىر جەردە ۇلگەرمەيمىز. ءبىراق بۇل ءومىر عوي. ءبىر جەردە جۇمىسكەرلەرىم دۇرىس جۇمىس ىستەمەيدى. ءبىراق تۇركسىب اۋدانىندا كوپ وزگەرىس بولىپ جاتىر. قىزمەتشىلەردىڭ ءوز جۇمىستارىن دۇرىس ورىنداۋىن مۇقيات باقىلاۋعا الامىز»، - دەدى ەربولات دوسايەۆ.

تۇركسىب اۋدانىنىڭ اكىمى باقىتجان اقجاروۆ «پياتيلەتكا» شاعىن اۋدانى بويىنشا ەكى جوبا ىسكە اسىپ جاتقانىن ايتتى.

«بۇل «الۆيس» كومپانياسىنىڭ كارىزدى سۋمەن جابدىقتاۋ جانە سۋ بۇرۋ جۇيەسىن سالۋ جۇمىستارى. دەپوۆسكايا كوشەسىندە جاڭبىر كارىزى بويىنشا جۇمىستار جاسالدى، الايدا، وندا كارىز قاقپاقتارى كوپ ۇرلانادى. بۇل ماسەلەنى بىزگە نۇرلان مىرزا ايتقان، ۇرلانعان قاقپاقتاردىڭ ورنىنا باسقا قاقپاقتاردى قويعانبىز، الايدا ولار دا قولدى بولدى. سوندىقتان بۇل ماسەلە بويىنشا پوليتسيا جانە ەكولوگيا باسقارماسىمەن بىرلەسىپ جۇمىس جۇرگىزەمىز»، - دەدى اۋدان اكىمى.

ەربولات دوسايەۆ اتالعان ماسەلە مەن باسقا دا قىلمىستاردىڭ الدىن الۋ ءۇشىن اۋدانعا بيىل شامامەن 600 باقىلاۋ بەينە كامەراسىن قويۋ جوسپاردا بار ەكەنىن ايتتى. سونداي-اق، شاعىم ايتقان تۇرعىننىڭ كوشەسىنە دە ارنايى بەينەباقىلاۋ كامەراسى قويىلىپ، اتالعان كارىز قۇدىقتارىنىڭ قاقپاقتارى دانەكەرلەنىپ، ەشكىم الماستاي جابىلاتىنىن ايتتى.

قالا تۇرعىنى ودان بولەك اۋداندا ەسىرتكىنى جاسىرىپ كەتۋشىلەردىڭ سانى وسكەنىن ايتتى.

ەربولات دوسايەۆ تۇركسىب اۋداندىق پوليتسيا باسقارماسىنىڭ باستىعىنا بۇل باعىتتا ءتيىستى جۇمىستار جۇرگىزىپ، ماسەلەنى باقىلاۋعا الۋدى تاپسىردى. سونداي-اق، ەسىرتكى جاسىرۋشىلار جۇرەتىن كوشەلەردى انىقتاپ، باقىلاۋ بەينە كامەرالارىن ورناتۋ قاجەتتىگىن جەتكىزدى.

اۆتور

دۋمان ارعىنگەلدى