ءساۋىردىڭ سوڭى مەن مامىردىڭ باسىنا اۋا رايى بولجامى جاسالدى

استانا. KAZINFORM - «قازگيدرومەت» وسى اپتا مەن مامىر ايىنىڭ العاشقى كۇندەرىنە ەل اۋماعىنداعى اۋا رايىنا بولجام جاسادى.

«سينوپتيكالىق بولجامعا سايكەس، الداعى اپتادا ەلىمىزدىڭ باسىم بولىگىندە جاۋىن-شاشىن كۇتىلەدى. اسىرەسە اپتانىڭ ورتاسىنا قاراي سولتۇستىك وڭىرلەردە نوسەر جاۋىن بولجانىپ وتىر. شىعىس جانە سولتۇستىك قازاقستاندا تۇندە جاڭبىر قارعا ۇلاسۋى مۇمكىن. وسى اپتانىڭ سوڭىنا قاراي، ەلىمىزدىڭ باسىم بولىگىندە اۋا تەمپەراتۋراسىنىڭ تومەندەۋى كۇتىلەدى. باتىستا، وڭتۇستىك جانە وڭتۇستىك شىعىستا 25-30 گرادۋستان 15-20 گرادۋسقا دەيىن تومەندەيدى. ال سولتۇستىك، شىعىس جانە ورتالىق وڭىرلەردە اۋا رايى كۇندىز 5-13 گرادۋسقا، تۇنگى ۋاقىتتا 1-6 گرادۋسقا دەيىن تومەندەيدى دەپ بولجانۋدا»، - دەدى «قازگيدرومەت» ر م ك ۇزاق مەرزىمدى اۋا رايى بولجامى باسقارماسىنىڭ باسشىسى جۇلدىز يسابەكوۆا مەكەمەدە وتكەن بريفينگىدە.

ماماننىڭ ايتۋىنشا، ماماردى باسىندا ەل اۋماعىنىڭ باسىم بولىگىندە جاڭبىر كۇتىلەدى.

«جاڭبىرمەن قوسا جەل كۇتىلەدى، سونىڭ اسەرىنەن اۋا تەمپەراتۋراسى تومەندەيدى. ياعني ءساۋىردىڭ سوڭعى كۇندەرى كۇن جىلىنىپ، مامىردىڭ باسىندا قايتا سۋيدى. سونداي-اق، جالپى مامىردا جوعارى تەمپەراتۋرا بولجانىپ وتىر، ەلىمىزدىڭ وڭتۇستىك وڭىرلەرىندە اۋا رايى كەي كۇندەرى 35-40 گرادۋسقا ال سولتۇستىك، شىعىس جانە ورتالىق وڭىرلەردە 25-35 گرادۋس ىستىق كۇتىلەدى. ىستىق كۇندەرى جاۋىن-شاشىنمەن اۋىسىپ وتىرادى. سوندىقتان سولتۇستىك ايماقتاردا اۋا تەمپەراتۋراسى تۇندە ۇسكىرىككە اينالۋى مۇمكىن»، - دەيدى ول.

سونداي-اق، «قازگيدرومەت» وكىلى مامىردا ەلىمىزدە اۋا رايىنىڭ قۇبىلمالى بولاتىنىن ايتتى.