الەمدە covid-تەن كەيىن ماماندىق اۋىستىرعاندار كوبەيگەن

نۇر-سۇلتان. قازاقپارات -چەحيانىڭ ەڭبەك نارىعىندا ەرەكشە قۇبىلىس بايقالىپ وتىر. ىندەتتەن كەيىن ەلدە قىزمەت كورسەتۋ مامانى جەتىسپەي جاتىر. كەزىندە وسى سالادا جۇمىس ىستەگەندەر بۇرىنعى كاسىبىنە ورالعىسى كەلمەيدى.

سەبەبى جۇرت لوكداۋن كەزىندە جاڭا ماماندىق يگەرىپ العان. وسىدان ءبىر جىل بۇرىن ياكۋب برەست پراگاداعى ەڭ ۇزدىك 10 اسپاز قاتارىندا بولعان. حاس شەبەردى «ميشلەن جۇلدىزىنا» يە پاريجدەگى مەيرامحانا جۇمىسقا الماق بولدى. الايدا كارانتين جاريالانىپ، ول ەلدەن شىعا المادى. ال كەيىن مەيرامحانالار جابىلىپ، ءتىپتى جۇمىسسىز قالدى. ب

ىرنەشە اي بويى ءۇمىت ۇزبەگەن ياكۋب سوڭىندا اۆتوكولىك جوندەيتىن شەبەرحاناعا جۇمىسقا تۇردى. بۇگىندە وسى سالانىڭ شەبەرىنە اينالدى.

ياكۋب برەست، دانەكەرلەۋشى:

- بۇرىنعى كاسىبىمدى ساعىنىپ جۇرگەن جوقپىن. وتباسىم ۇلكەن، اسپازدىق ەندى ءحوببيىم، جاقىندارىما ءدامدى تاعامدار دايىندايمىن. بۇرىنعىداي اقشا تاۋىپ ءجۇرمىن. ءبىراق شەبەرحانادا از شارشايمىن جانە وتباسىمدى ءجيى كورەتىن بولدىم.

پراگادا وسىنداي بىرنەشە مىڭ ادام بار. وسىدان جارتى جىل بۇرىن قىزمەت كورسەتۋ سالاسىنىڭ ماماندارى جۇمىس ىزدەپ الەك بولسا، بۇگىندە جاعداي مۇلدەم وزگەردى. اسپازدار مەن اكىمشىلەردى جالداي الماعاندىقتان، قالاداعى 8 كافە ءالى اشىلعان جوق. پلزەن قالاسىندا ءبىر توي ۇيىمداستىرۋشىسى ءۇشىن 4 كومپانيا تالاسىپ ءجۇر.

مارتين ميشتافوۆيچ پراگا قالاسى ەڭبەك بيرجاسىنىڭ زاڭگەرى:

- ادامدار قول جۇمىسىمەن دە اقشا تابۋعا بولاتىنىن ءتۇسىندى. بۇرىن مۇنى قارا جۇمىس دەپ مەنسىنبەيتىن. قازىر انيماتورلارعا، گيدتەرگە سۇرانىس كوپ. ءبىراق وسى ىسپەن اينالىسقاندار وزگە سالالاردا تابىسقا جەتىپ، بۇرىنعى كاسىبىنە ورالعىسى كەلمەيدى.

سونداي- اق، جاڭا ماماندىق يگەرگەندەر تۇراقتىلىقتى باعالايدى. ىندەتتىڭ جاڭا تولقىنى باستالسا، تابىسسىز قالمايتىنىنا كوزى جەتتى. ال ۇكىمەت كۇزدە ىندەت قايتا ءورشۋى مۇمكىن دەيدى.

www.24.kz