بەيجىڭدە COVID-19 بايلانىستى كارانتين كۇشەيتىلدى

«سوڭعى 24 ساعات ىشىندە بەيجىڭدە كوروناۆيرۋس جۇقتىرۋدىڭ 22 جاعدايى تىركەلدى»، - دەلىنگەن قىتايدىڭ گيگيەنا جانە دەنساۋلىق ىستەرى جونىندەگى مەملەكەتتىك كوميتەتىنىڭ جەكسەنبى كۇنى جاريالاعان ەسەبىندە.
COVID-19-عا شالدىعۋ دەرەكتەرى كوبەيىپ وتىرعاندىقتان بەيجىڭ بيلىگى ەپيدەمياعا قارسى شارالاردى كۇشەيتۋدە. سەنبىدەن باستاپ چاويان اۋدانىنداعى سەگىز شاعىناۋدان كوروناۆيرۋسقا تەكسەرىلدى.
«ەپيدەميولوگيالىق تەكسەرۋدىڭ الدىن الا ناتيجەلەرى اۋرۋدىڭ قازىرگى تولقىنى شامامەن ءبىر اپتا بويى جاسىرىن تۇردە تارالىپ جاتقانىن كورسەتتى»، - دەدى بەيجىڭ اۋرۋلاردى باقىلاۋ جانە الدىن الۋ ورتالىعى باسشىسىنىڭ ورىنباسارى پان شينحو سەنبى كۇنى بريفينگىدە.
قالا بيلىگى مەگاپوليس تۇرعىندارىن اسا قاجەتتىلىك بولماسا بەيجىڭ اۋماعىنان شىقپاۋعا، ادام كوپ جينالاتىن ورىندارعا بارماۋعا، COVID-19 جۇقتىرۋ قاۋپى ورتاشا جانە جوعارى ايماقتارعا بارۋدان باس تارتۋعا شاقىرادى.
«سكرينينگىلىك شارالار كۇشەيتىلگەندىكتەن، الداعى ۋاقىتتا اۋرۋدىڭ جاڭا جاعدايلارى انىقتالۋى مۇمكىن»، - دەپ تۇيىندەدى قىتايلىق ەپيدەميولوگ.
رەسمي دەرەكتەرگە سايكەس، ۇستىمىزدەگى جىلدىڭ 1-ناۋرىزىنان بەرى قىتايدىڭ ماتەريكتىك اۋماعىندا كوروناۆيرۋس ينفەكتسياسىنىڭ بارلىعى 600 مىڭعا جۋىق جاعدايى تىركەلدى.
كوروناۆيرۋستىڭ جاڭا تولقىنىنان تيبەت اۆتونوميالىق اۋدانىن قوسپاعاندا، قىتايدىڭ 31 اكىمشىلىك- اۋماقتىق بىرلىگىنىڭ 30 ى (پروۆينتسيالار، اۆتونوميالىق اۋداندار، ورتالىققا باعىنىستى قالالار) زارداپ شەكتى. ماتەريكتىك قىتايدا ەپيدەميالىق احۋال كۇردەلى كۇيىندە قالىپ وتىر. وتكەن تاۋلىكتە ەلدە ينفەكتسيانىڭ 21796 جاعدايى تىركەلدى، ونىڭ ىشىندە تەك شاڭحايدا - 21058.