وليمپيادا الدىنداعى توكيودا COVID-19 جۇقتىرۋدىڭ سوڭعى ايداعى رەكوردتىق جاعدايى تىركەلدى
بۇل كورسەتكىش ىندەتكە شالدىققانداردىڭ كۇرت وسكەنىن كورسەتەدى، دەپ حابارلايدى قازاقپارات كيودو اگەنتتىگىنە سىلتەمە جاساپ.
توكيودا ينفەكسيا جۇقتىرۋدىڭ جەتى كۇنگى ورتاق تاۋلىكتىك كورسەتكىشى 508,4 بولىپ وتىر.
بۇل ۇكىمەتتىڭ شكالاسى بويىنشا ءتورتىنشى - ەڭ ناشار دەڭگەي. اۋرۋدىڭ قايتا ءورشۋى پرەمەر-مينيستر ەسيحيدە سۋگانىڭ توكيودا وليمپياداعا ءبىر ايدان از ۋاقىت قالعان كەزدە تاعى ءبىر توتەنشە جاعداي ەنگىزۋى مۇمكىن دەگەن قورقىنىش تۋدىردى.
«ءبىز احۋالدى مۇقيات باقىلاپ وتىرامىز جانە ۋاقىتىندا كەرەكتى شارالاردى قولدانامىز»، - دەدى سۋگا سارسەنبى كۇنى COVID-19 بويىنشا مينيسترلىك وتىرىسىندا.
دەنساۋلىق ساقتاۋ مينيسترلىگىنىڭ ساراپتامالىق توپتارىنىڭ بولەك وتىرىسىندا ۇلتتىق جۇقپالى اۋرۋلار ينستيتۋتىنىڭ باعالاۋىنشا، العاش رەت ءۇندىستاندا انىقتالعان كوروناۆيرۋستىڭ دەلتا نۇسقاسى ماۋسىمنىڭ سوڭىنداعى توكيوداعى جانە كورشى پرەفەكتۋرالارداعى جۇقتىرۋ وقيعالارىنىڭ 30 پايىزىنىڭ سەبەبى بولعان.
ينستيتۋت بۇل كورسەتكىشتىڭ 23- شىلدەدە بولاتىن وليمپيادا ويىندارىنىڭ اشىلۋىنىڭ الدىندا 50 پايىزعا جەتۋى مۇمكىن دەپ ەسكەرتتى.
دەنساۋلىق ساقتاۋ، ەڭبەك جانە الەۋمەتتىك قامتاماسىز ەتۋ ءمينيسترى نوريحيسا تامۋرا استانالىق اۋرۋحانالارداعى توسەك ورىن تاپشىلىعىن قالاي شەشۋگە بولاتىنىن تالقىلاۋعا شاقىردى.
توكيودا ماۋسىم ايىندا كوروناۆيرۋستىڭ 12979 جاڭا وقيعاسى تىركەلدى.
ايتا كەتسەك، وليمپيادا ويىندارى 2020-جىلدىڭ 24- شىلدەسى مەن 9- تامىزى ارالىعىندا ءوتۋى ءتيىس ەدى. الايدا پاندەميا سالدارىنان ۋاقىتى ءبىر جىلعا شەگەرىلىپ، وسى جىلدىڭ 23- شىلدەسى مەن 8- تامىزى ارالىعىندا وتەتىن بولدى.
