قىرعىزستاندا Covid-19 ۆيرۋسىن جۇقتىرۋشىلار سانى كۇرت ءوستى
نۇر-سۇلتان. قازاقپارات - قىرعىزستان شىلدە ايىندا Covid-19-عا شالدىققاندار سانى 4,5 ەسەگە وسكەن، دەپ حابارلايدى قازاقپارات BBC- گە سىلتەمە جاساپ.
قىرعىزستاندا كوروناۆيرۋس جۇقتىرعاندار سانىنىڭ كۇرت وسۋىنە بايلانىستى اۋرۋحانالاردا ورىن جەتپەي جاتىر، ءدارى-دارمەكتەردى ناۋقاستاردىڭ تۋىستارى ساتىپ الۋدا. ەلدىڭ دەنساۋلىق ساقتاۋ جۇيەسى وزدەرىنە جۇكتەلگەن مىندەتتى ورىنداي الماي جاتىر، ال دەپۋتاتتار دەمالىسقا كەتتى.
قىرعىزستان كورشىلەرى قازاقستان مەن وزبەكستان سەكىلدى ناۋرىز ايىنىڭ سوڭىندا اۋە شەكاراسىن جاۋىپ، ەلدە قاتاڭ شەكتەۋ ەنگىزدى. ەلدىڭ ەڭ ءىرى ءۇش قالاسىندا - بىشكەك، وش، دجالال- ابادتا جانە بىرنەشە اۋداندا توتەنشە جاعداي جانە كومەندانتتىق ساعات جاريالاندى.
جەرگىلىكتى تۇرعىنداردىڭ ۇيلەرىنەن شىعۋىنا تىيىم سالىنىپ، كاسىپورىنداردىڭ قىزمەتكەرلەرى قاشىقتان جۇمىس ىستەدى.
قوعامدىق كولىكتەر مەن تاكسي توقتاتىلىپ، ەلدەگى ءبىلىم وشاقتارى ەكى ايعا جابىلدى. شەكتەۋدى بۇزعاندارعا ايىپپۇل سالىندى.
مۇنداي قاتاڭ شارالار قىرعىزستانعا قىمباتقا ءتۇستى: سالىق ونداعان ەسەگە قىسقاردى. بيۋجەت دەفيتسيتى 37 ميلليارد سومعا (500 ميلليون دوللار) جەتتى. ەكونوميكا مينيسترلىگى جىل قورىتىندىسى بويىنشا ج ءى ءو - مينۋس %5,3 عا تومەندەيدى دەپ بولجاپ وتىر. بۇل ەل مۇنداي داعدارىستى 1990-جىلدارى باستان وتكەرگەن ەدى. مامىر ايىندا كارانتين بوساڭسىعان كەزدە دەنساۋلىق ساقتاۋ مينيسترلىگى 6,5 ميلليون تۇرعىن اراسىندا تەك 1002 ادام اۋرۋ جۇقتىرىپ، 12 ادامنىڭ قايتىس بولعانىن ءمالىم ەتتى.
اۋرۋعا شالدىققانداردىڭ باسىم بولىگى باسقا ەلدەردەن كەلگەن قىرعىز ازاماتتارى. قىرعىزستان شەكتەۋ شارالارىن ءبىر ايدىڭ ىشىندە بىرتىندەپ الا باستادى:
ەكونوميكانىڭ بارلىق سەكتورى، سونىڭ ىشىندە قوعامدىق كولىكتەر مەن بازارلار بىرىنەن كەيىن ءبىرى جۇمىسقا كىرىستى. سول كەزدە Covid-19 جۇقتىرعاندار سانى 2 مىڭ ادامعا جەتتى. ماۋسىم ايىندا بارلىق شەكتەۋ شارالارى الىنىپ تاستالعاننان كەيىن اۋرۋعا شالدىققاندار سانى بىردەن ءوستى:
كارانتين كەزىندە كۇنىنە 25-80 ادام كوروناۆيرۋس جۇقتىرسا، ماۋسىم ايىنىڭ ورتاسىندا بۇل كورسەتكىش 300-700 ادامعا جەتتى. قازىر قالادا ادامدار دۇرلىگىپ جاتىر.
