COVID-19: ءۇي كارانتينىنە قانداي تالاپ قويىلادى

نۇر-سۇلتان. قازاقپارات – ق ر دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا ءۇي كارانتينىن ۇيىمداستىرۋ ءۇشىن تۇرۋ جاعدايىنا قانداي تالاپ قويلاتىندىعىن ءتۇسىندىردى، دەپ حابارلايدى قازاقپارات ءتىلشىسى.

ۆيتسە-ءمينيستردىڭ Facebook پاراقشاسىنداعى جازباسىنا سايكەس، سيمپتومسىز ۆيرۋس تاسىمالداۋشىلىق كەزىندە پاتسيەنتتى وقشاۋلاۋ جاعدايى تۋىنداعاندا امبۋلاتوريالىق جاعدايلاردا مەديتسينالىق باقىلاۋعا جانە ۇيدە وقشاۋلاۋعا (ءۇي كارانتينى) جاتادى.

بۇل رەتتە ءۇي كارانتينىن ۇيىمداستىرۋ ءۇشىن تۇرۋ جاعدايلارىنا ءبىرقاتار تالاپ قويىلادى. بىرىنشىدەن، بايلانىستا بولعان ادام كورشىلەردەن (باسقا وتباسى مۇشەلەرىنەن) وقشاۋلانا الاتىن جەكە پاتەر (جەكە دارەتحاناسى بار جەكە بولمە) بولۋى كەرەك.

ەكىنشىدەن، بايلانىستا بولعان ادام جانە وتباسىنىڭ/ءۇي شارۋاشىلىعىنىڭ باسقا مۇشەلەرى جەكە قورعانىش قۇرالدارىنا (مەديتسينالىق ماسكالار، قولعاپتار) قول جەتكىزە الۋى جانە ساقتىق شارالارىن (قولدى سابىنمەن ءجيى جۋۋ، ىلعالدى جيناۋ جۇرگىزۋ، ءۇي-جايدى جەلدەتۋ) ساقتاۋعا قابىلەتتى بولۋى ءتيىس.

ۇشىنشىدەن، ءۇي شارۋاشىلىعىندا COVID-19 ينفەكسياسىنان كەيىن اسقىنۋ قاۋپى جوعارى (65 جاستان اسقان ادامدار، 5 جاسقا دەيىنگى بالالار، جۇكتى ايەلدەر، يممۋنيتەتى ءالسىز نەمەسە جۇرەكتىڭ، وكپەنىڭ نەمەسە بۇيرەكتىڭ سوزىلمالى اۋرۋلارى بار ادامدار) ادامدار جوق بولۋى قاجەت.

تورتىنشىدەن، ستاتسيونارلىق تەلەفونى نەمەسە ۇيالى بايلانىسقا قولجەتىمدىلىگى بولۋى شارت. بەسىنشىدەن، ءۇي كارانتينىن ساقتاۋ جاعدايلارىن مىندەتتى ورىنداۋ تۋرالى قول قويىلعان قولحات بەرىلەدى. التىنشىدان، ادام ءۇي كارانتينى رەجيمىن ساقتاۋ جونىندە وزىنە مىندەتتەمە الادى جانە قولحاتتا جەكە قول قويۋىمەن راستايدى.

ءۇي كارانتينى رەجيمىن بۇزعان ادامدار اكىمشىلىك جاۋاپكەرشىلىككە تارتىلادى. اتالعان تالاپتاردى ساقتاۋ مۇمكىن بولماعان جاعدايدا كارانتين كارانتيندىك ستاتسيوناردا جۇزەگە اسىرىلادى.

«ۇيدە وقشاۋلاۋ ءۇشىن جاعدايلار بولماعان كەزدە ەمدەۋگە جاتقىزۋ تۋرالى شەشىمدى مەديتسينالىق- سانيتارلىق كومەك مامانى ءاربىر جاعدايدا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى اۋماقتىق بولىمشەسىنىڭ ەپيدەميولوگىمەن كەلىسىم بويىنشا جەكە قابىلدايدى»، - دەدى ليۋدميلا بيۋرابەكوۆا.

ونىڭ اتاپ وتۋىنشە، ءۇي كارانتينىندەگى ادام ۇيدەن شىقپاۋى، پاتەردە وتباسىنىڭ باسقا مۇشەلەرى تۇراتىن جاعدايدا ەسىگى جابىلاتىن، جاقسى جەلدەتىلەتىن جەكە بولمەدە بولۋى قاجەت. تەك قاجەتتى شارالار ءۇشىن جانە قىسقا ۋاقىتقا عانا بولمەدەن شىعۋعا رۇقسات ەتىلەدى. بۇل رەتتە اۋىز بەن مۇرىن مەديتسينالىق ماسكامەن جابىلۋى ءتيىس.

ۆيرۋستىڭ تارالۋىن بولدىرماۋ ءۇشىن تۇشكىرگەندە نەمەسە جوتەلگەندە اۋىز بەن مۇرىندى ءبىر رەت قولدانىلاتىن قول ورامالىمەن جاپقان دۇرىس. وسىدان كەيىن قولدى سابىنمەن جۋۋ نەمەسە ونى سپيرت نەگىزىندەگى انتيسەپتيكپەن وڭدەۋ قاجەت.

تاماق تانۋ الدىندا، سونداي-اق دارەتحاناعا بارعاننان كەيىن قولدى سابىنمەن جۋۋ نەمەسە سپيرت نەگىزىندەگى انتيسەپتيكپەن وڭدەۋ كەرەك. قولدى ءسۇرتۋ ءۇشىن ءبىر رەت قولدانىلاتىن سۋلىقتاردى پايدالانعان دۇرىس.

مۇمكىندىگىنشە جەكە دارەتحانانى پايدالانۋ قاجەت. تەمپەراتۋرا نەمەسە السىزدەنۋ بەلگىلەرى پايدا بولعان كەزدە كارانتين تۋرالى حابارلاپ جانە جۇگىنۋ سەبەبىن كورسەتە وتىرىپ، COVID-19 بويىنشا كولل- ورتالىققا جۇگىنۋ نەمەسە جەدەل جاردەمگە قوڭىراۋ شالۋ كەرەك.

اۆتور: مارلان جيەمباي