قاراعاندىدا COVID-19 جۇقتىرعان دارىگەر ىندەتتەن قالاي جازىلعانىن ايتىپ بەردى

قاراعاندى. قازاقپارات - قاراعاندى قالاسى بالالار اۋرۋحاناسىنىڭ رەانيماتولوگيا ءبولىمىنىڭ مەڭگەرۋشىسى ەليزاۆەتا كالمباح قازىر COVID-19 دەرتىنەن ەمدەلۋدە.

ەكى كۇن بويى جانساقتاۋ شارالارىن جۇرگىزىپ، جاعدايى جاقسارعاننان كەيىن ول پالاتاعا اۋىستىرىلعان، دەپ حابارلايدى قازاقپارات ءتىلشىسى. ەليزاۆەتا كالمباح كوروناۆيرۋس ينفەكسياسىن قايدان جۇقتىرعانىن بىلمەيدى.

«جۇمىستا ءبىز بارلىق ساقتىق شارالارىن قاتاڭ ساقتادىق. مەنىڭ بىرنەشە ارىپتەسىم جانە مەن COVID-19 دەرتىنە شالدىقساق تا، ونى پاتسيەنتتەرىمىزگە جۇقتىرعان جوقپىز. ءبىراق ءبىز، دارىگەرلەر قوعامنان وقشاۋ ەمەسپىز. مەن كەز كەلگەن قاراپايىم ادام سەكىلدى دۇكەنگە بارامىن، اۆتوبۋستا جۇرەمىن. ارينە، ءبىز جۇمىسىمىزدىڭ ەرەكشەلىكتەرىنە وراي ءبىز قاۋىپ-قاتەر ايماعىندامىز»، - دەيدى ول. اعزاسىنداعى اۋرۋدىڭ العاشقى بەلگىلەرىن دارىگەر- رەانيماتولوگ ءوزى انىقتاعان. سول كۇنى ول قوعامنان ءوز ەركىمەن وقشاۋلانىپ، ارىپتەستەرىنە جۇگىندى.

«مەن بىردەن كوروناۆيرۋستى جۇقتىردىم با دەپ كۇدىكتەندىم. بىرىنشىدەن، ەپيدەميولوگيالىق جاعدايعا بايلانىستى. ەكىنشىدەن، مەندە وسى دەرتكە ءتان بەلگىلەر بولدى: بۇلشىق ەت، كەۋدەم اۋىردى. بۇل بەلگىلەر مەنىڭ ىستىعىم كوتەرىلگەننەن كەيىن بىرنەشە ساعاتتان كەيىن پايدا بولدى»، - دەپ ەسىنە الادى ەليزاۆەتا كالمباح.

جەدەل جاردەمگە جۇگىنگەننەن كەيىن ونى اۋرۋحاناعا جاتقىزىپ، اناليز الىپ، كومپيۋتەرلىك توموگرافيا جۇرگىزىلگەن. زەرتتەۋ ناتيجەسى دايىن بولعان سوڭ دارىگەرلەر COVID-19 بارىن راستادى. بىرنەشە كۇننەن كەيىن پاتسيەنتتىڭ جاعدايى ناشارلاپ، ونى جانساقتاۋ بولىمىنە اۋىستىرۋعا ءماجبۇر بولدى.

«ارينە، دارىگەر بولعاندىقتان ماعان پاتسيەنت رەتىندە جاتىپ، ەمدەلۋ وڭاي بولمادى. جاعدايدى باقىلاي المايتىنىم، وعان ەش اسەر ەتە المايتىنىم اۋىر ءتيدى. ءبىراق ەمدەۋدىڭ بارلىق كەزەڭىندە ارىپتەستەرىم بار كۇش-جىگەرىن سالدى. ولار مەنى قولدادى، بارىنشا ۇيلەسىمدى جانە ءتيىمدى جۇمىس ىستەدى جانە ماعان كومەكتەسىپ وتىردى»، - دەيدى بالالار رەانيماتولوگى.

سىرقاتتانعان ايەل ينفەكتسيالىق گوسپيتالدا جاتقان كەزدە تۋىستارىمەن جانە جاقىندارىمەن تەلەفون ارقىلى بايلانىسىپ وتىرعان. پروفەسسور ح. ج. ماقاجانوۆ اتىنداعى كوپسالالى اۋرۋحانانىڭ جۇقپالى اۋرۋلار گوسپيتالى 100 توسەككە ەسەپتەلگەن. قازىر وندا ءبىر دە ءبىر ورىن بوس ەمەس. قازىر COVID-19 دەرتىنە شالدىققان توعىز ناۋقاس جانساقتاۋ بولىمىندە جاتىر. بىرەۋى وكپەنى جاساندى جەلدەتۋ اپپاراتىنا قوسىلعان.

«ءتۇرلى ەلدەردىڭ دارىگەرلىك تاجىريبەسىنە نەگىزدەلگەن سوڭعى مالىمەت بويىنشا، اپپاراتقا قوسۋ - سوڭعى توتەنشە شارا. وعان قوسۋ ءۇشىن ادامنىڭ تىنىس الۋىن تولىق توقتاتۋ كەرەك. ەگەر مۇمكىندىك بولسا ينۆازيۆتى ەمەس ادىستەرگە جۇگىنگەن ءجون. بۇل رەتتە ادام ءوزى تىنىس الادى، ال اپپارات وعان كومەكتەسەدى. جانساقتاۋ بولىمىندە قازىر سەگىز ناۋقاس ءدال وسى جاعدايدا جاتىر. ولار ەسىن بىلەدى، ءبىز ءتىپتى تاماقتاندىرۋ ءۇشىن كەيدە ولاردىڭ اپپاراتىن وشىرەمىز. كەيبىرەۋلەرىنىڭ جاعدايى دارەتحاناعا ءوز بەتىنشە بارۋعا دا جەتەدى»، - دەيدى پروفەسسور ح. ج. ماقاجانوۆ اتىنداعى كوپسالالى اۋرۋحانانىڭ جانساقتاۋ جانە قارقىندى تەراپيا ءبولىمىنىڭ مەڭگەرۋشىسى سەرگەي كيم.

بۇگىنگى تاڭدا قاراعاندى وبلىسىندا 1238 ادام COVID-19 جۇقتىرعان. ونىڭ ىشىندە 530 پاتسيەنت ساۋىعىپ، 6 ادام كوز جۇمدى.