COVID-19 كەزىندە وكپەگە نەلىكتەن زاقىم تۇسەتىنى بەلگىلى بولدى

قاۋىپتى اسقىنۋعا كوروناۆيرۋس جۇقتىرعان ناۋقاستىڭ ورگانيزمىندە تەمىردىڭ جەتىسپەۋى سەبەپ بولادى. بۇل تۋرالى رەسەي تەراپيەۆتەرىنىڭ عىلىمي مەديتسينالىق قوعامىنىڭ ۆيتسە- پرەزيدەنتى، مەديتسينا عىلىمدارىنىڭ دوكتورى، پروفەسسور لەونيد لازەبنيك «ارگۋمەنتى ي فاكتى» پورتالىنا بەرگەن سۇحباتىندا ايتتى.

بۇل - انتيبيوتيكتەر COVID-19 جۇقتىرعان ناۋقاسقا كومەكتەسپەيتىنى جانە جاساندى تىنىس الدىرۋ اپپاراتىنىڭ كومەكتەسپەيتىنى تۋرالى سۇراقتىڭ جاۋابى.

«كوروناۆيرۋس جۇقتىرعان كەزدە وكپەنىڭ ناشارلاۋى پنيەۆمونياعا ۇقسامايدى، ونى العاش قىتايلىق دارىگەرلەر انىقتاعان. ارتىنشا مۇنى امەريكالىق جانە يزرايلدىك دارىگەرلەر راستاعان. وكپە ءتىنىنىڭ كوروناۆيرۋس ينفەكتسياسى كەزىندە زاقىمدالعانىن كومپيۋتەر توموگرافياسى انىقتايدى. ال ادەتتەگى پنيەۆمونيانى رەنتگەن زەرتتەۋى دە كورسەتەدى»، - دەيدى پروفەسسور.

لەونيد لازەبنيك COVID-19 گەموگلوبين گەنىنە زاقىم كەلتىرەتىنىن، ناتيجەسىندە تەمىر اتومى بۇعاتتالاتىنىن ايتادى. ناتيجەسىن ادام ورگانيزمىندە تەمىر جەتىسپەۋى پايدا بولىپ، وتتەگى الماسۋىنا كەدەرگى كەلتىرەدى.

«بۇل قاۋىپتى اسقىنۋ فەرريتيننىڭ (اعزاداعى تەمىردى توپتاستىراتىن، باۋىردا وندىرىلەتىن اقۋىز) ۇلعايۋىنا اكەپ سوعادى. فەرريتيننىڭ ارتىق بولۋى «سيتوكين داۋىلى» - يممۋندىق جۇيەنىڭ شامادان تىس رەاكسياسىن تۋدىرادى، يممۋندىق جاسۋشالاردىڭ ارتىق مولشەرى پايدا بولادى. «سيتوكين داۋىلى» جاي- كۇيدىڭ كەنەتتەن ناشارلاۋىنا اسەر ەتەدى، بۇل اۋرۋدى جەڭىل وتكەرەتىن ناۋقاستاردىڭ كەنەتتەن كوز جۇمۋىنا سەبەپ بولادى»، - دەيدى پروفەسسور.