ءۇندىستانداعى احۋال: COVID-19 دان كوز جۇمعاندار سانى 400 مىڭعا جەتتى

نيۋ دەلي. kyodo-قازاقپارات - جۇما كۇنى ءۇندىستان جاڭا كوروناۆيرۋس ينفەكسياسىنان قايتىس بولعانداردىڭ سانى 400000 عا جەتكەنى تۋرالى مالىمدەدى، ولاردىڭ جارتىسى سوڭعى ەكى ايدا تىركەلگەن، دەپ حابارلايدى قازاقپارات kyodo اگەنتتىگىنە سىلتەمە جاساپ.

دەنساۋلىق ساقتاۋ مينيسترلىگىنىڭ دەرەگىنشە، سوڭعى تاۋلىكتە كوروناۆيرۋستان 453 ادام قايتىس بولعان، وسىلايشا پاندەميانىڭ باسىنان بەرى ءولىم سانى 400312 گە جەتتى. دجونس حوپكينس ۋنيۆەريستەتىنىڭ دەرەگىنە ساي، ءۇندىستان قازىرگى كەزدە ءولىم سانى بويىنشا ا ق ش پەن برازيليادان كەيىن ءۇشىنشى ورىندا تۇر.

سوڭعى تاۋلىكتە ەلدە 46617 ادام كوروناۆيرۋس جۇقتىرعان، جالپى سانى - 30458251.

مامىردا ءۇندىستاندا الەم بويىنشا 400000 نان اساتىن ءبىر تاۋلىكتە ەڭ كوپ جۇقتىرۋ وقيعاسى تىركەلگەن، ماۋسىمنىڭ ەكىنشى جارتىسىندا جۇقتىرۋ سانى ازايا باستادى - كۇنىنە 50000 نان از وقيعا تىركەلىپ وتىردى.

ەل ۇكىمەتى Delta Plus نۇسقاسىنىڭ پايدا بولۋىن ەسكەرە وتىرىپ، جاقىن ايلاردا ينفەكسيانىڭ ءۇشىنشى تولقىنىنا دايىندىقتى كۇشەيتتى. دەنساۋلىق ساقتاۋ مينيسترلىگىنىڭ دەرەگىنشە، ۆاكسينالاۋ باعدارلاماسىنىڭ باسىنان بەرى 340 ميلليون دوزا ەكپە سالىنعان.