ءۇندىستانىڭ ۇشاعى جەدەل تۇردە تۇركياعا قونۋعا ءماجبۇر بولدى

استانا. KAZINFORM - ءۇندىستاننىڭ Vistara اۋە كومپانياسىنىڭ 247 جولاۋشىسى بار ۇشاعى بومبا قويىلعانى تۋرالى اقپاراتقا بايلانىستى تۇركيانىڭ وڭتۇستىگىندەگى ەرزۋرۋم قالاسىنا قوندى. TRT تەلەارناسىنىڭ حابارلاۋىنشا، ۇشاق مۋمباي-ميۋنحەن باعىتىمەن ۇشىپ بارا جاتقان.

«ءۇندىستان اۋە كومپانياسىنىڭ ۇشاعى ۇشىپ بارا جاتقان كەزدە بورتتا بومبا بار ەكەندىگى جونىندە اقپارات تۇسكەن. ۇشاق شۇعىل تۇردە ەرزۋرۋم قالاسىنا قوندى. قازىر ول قاۋىپسىز جەردە. اۋەجايدان ۇشاقتاردى جىبەرۋ جانە قابىلداۋعا ۋاقىتشا تىيىم سالىنعان. ماماندار اۋە كەمەسىن تەكسەرىپ جاتىر. ەگەر قاۋىپ بار ەكەنى راستالماسا ۇشاق ساپارىن جالعاستىرادى»، - دەپ حابارلادى ەرزۋرۋم گۋبەرناتورى مۇستافا چيفتچي.

سونىمەن قاتار ۇشاق ەكيپاجى مەن جولاۋشىلار قاۋىپسىز جەرگە كوشىرىلگەنى حابارلاندى. قازىرگى تاڭدا جارىلعىش زاتتارمەن جۇمىس ىستەيتىن مامان لاينەردى تەكسەرىپ جاتىر.

بومبا تۋرالى حابار 600 جولاۋشىنى الىپ ۇشۋعا قاۋقارلى ۇشاق تۇركيانىڭ اۋە كەڭىستىگىنە كىرگەندە تۇسكەن. الدىمەن وردۋ قالاسىنا قونۋعا رۇقسات سۇراعان ۇشاق ەرزۋرۋم قالاسىنا قوندى.