ءۇندىستاننان كەلگەن جولاۋشىدان انىقتالعان تىرىسقاق وشاعى جويىلدى – د س م
استانا. KAZINFORM - دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆا ءۇندىستاننان كەلگەن جولاۋشىدان انىقتالعان تىرىسقاق وشاعى جويىلعانىن ءمالىم ەتتى.
«سونىمەن قاتار رەسمي وكىل ەلىمىزدىڭ سانيتاريالىق-ەپيدەميولوگيالىق قىزمەتى دەلي-الماتى باعىتى بويىنشا Air Astana اۋە كومپانياسى رەيسىنىڭ بورتىندا تىركەلگەن تىرىسقاق جاعدايى وشاعىنىڭ ءساتتى جويىلعاندىعىن حابارلايدى. سانيتاريالىق-ەپيدەميولوگيالىق قىزمەت ماماندارىنىڭ جەدەل ءىس-قيمىلىنىڭ ارقاسىندا ەل ىشىندە تىرىسقاقتىڭ تارالۋ كوزىن جويۋعا، ينفەكسيانى ۋاقتىلى انىقتاۋعا جانە وقشاۋلاۋعا مۇمكىندىك بولدى. سىرقاتتانعان قىرعىز رەسپۋبليكاسىنىڭ ازاماتشاسى ەمدەلۋدەن ءساتتى ءوتىپ، ستاتسيوناردان شىعارىلدى»، - دەدى رەسمي وكىل ورتالىق كوممۋنيكاتسيالار قىزمەتىندەگى بريفينگتە.
بۇعان دەيىن 5-ءساۋىر كۇنى دەلي-الماتى باعىتى بويىنشا Air Astana رەيسىنىڭ بورتىندا سانيتارلىق-كارانتيندىك باقىلاۋدى جۇزەگە اسىرۋ بارىسىندا ءىش ءوتۋ، ايقىن السىزدىك، اۋىزدىڭ قۇرعاۋى تۋرالى شاعىمدارى بار جولاۋشى انىقتالعانىن حابارلاعان ەدىك.
