ءۇندىستاندا جولبارىس كوبەيە باستادى
جەر بەتىندە اڭ-قۇس ازايسا، ءۇندىستاندا جولبارىس كوبەيدى. 12 جىلدا بۇل جىرتقىشتىڭ سانى 2 ەسە ارتقان. بۇل - جانۋارلاردى قورعاۋ ۇيىمدارى عانا ەمەس، جەرگىلىكتى تۇرعىندار ءۇشىن دە قۋانىشتى جاڭالىق. ويتكەنى ولاردىڭ تابىسىنىڭ ارتۋىنا سەپتىگىن تيگىزىپ وتىر.
جولبارىس پوپۋلياتسياسىنىڭ ارتۋىنا نە سەبەپ؟
80 جىل بۇرىن ءۇندىستان اۋماعىندا 40 مىڭعا جۋىق جولبارىس مەكەن ەتكەن. ءبىراق 2010-جىلدارعا تامان ولاردىڭ سانى كۇرت ازايادى. ونداعان مىڭ جىرتقىشتان 1700 عانا قالادى. بۇعان جانۋارلاردىڭ تىرشىلىك ەتۋ مەكەنىنىڭ ازايۋى جانە زاڭسىز اڭشىلىق سەبەپ. سودان جەرگىلىكتى بيلىك جولبارىستىڭ پوپۋلياتسياسىن قالپىنا كەلتىرۋ بويىنشا اۋقىمدى ءىس- شارالاردى قولعا الدى. قورىقتاردى باقىلاۋدى كۇشەيتىپ، جىرتقىشتاردىڭ شابۋىلىنان زارداپ شەككەن شارۋالارعا وتەماقى تولەۋ باعدارلاماسىن ىسكە قوستى. براكونەرلەرگە قارسى زاڭدى قاتاڭداتتى. كوپ ۇزاماي قولعا الىنعان شارالار ناتيجەسىن بەردى. 2010-جىلى ءۇندىستاندا 1706 جولبارىس مەكەن ەتسە، 2022 -جىلى سانى ونىڭ سانى ەداۋىر كوبەيىپ 3700 گە جۋىقتايدى.
يادۆەندراديەۆ دجحالا، ءۇندىستان ۇلتتىق عىلىم اكادەمياسىنىڭ وكىلى:
- ءبىزدىڭ زەرتتەۋ 2006-جىلدان بەرى جالعاسىپ كەلەدى. بۇرىندارى جولبارىستاردىڭ تىرشىلىك ەتەتىن مەكەنى 70 مىڭ شارشى شاقىرىمداي بولاتىن. ءبىراق اۋقىمدى وزگەرىستەردىڭ ناتيجەسىندە قازىر بۇل اۋماق 130 مىڭ شارشى شاقىرىمعا دەيىن جەتتى. زەرتتەۋ ناتيجەسى تەك جانۋارلاردى قورعاۋ ۇيىمدارىن عانا قۋانتىپ وتىرعان جوق. تۇرعىندار دا مۇنىڭ جاقسى جاڭالىق ەكەنىن ايتادى. ويتكەنى جولبارىستار كوبەيگەسىن ەكوتۋريزم دامىپ، جەرگىلىكتى جۇرتتىڭ تابىسى ارتقان.
يادۆەندراديەۆ دجحالا، ءۇندىستان ۇلتتىق عىلىم اكادەمياسىنىڭ وكىلى:
- حالىقتىڭ تىعىز ورنالاسۋى جىرتقىشتار سانىنىڭ كوبەيۋىنە كەدەرگى ەتەدى دەگەن قاتە تۇسىنىك قالىپتاسقان. ءبىزدىڭ زەرتتەۋىمىز مۇنىڭ ءبارى نەگىزسىز ەكەنىن كورسەتىپ وتىر. حالىق سانىنان گورى سول ادامداردىڭ جانۋارلارعا دەگەن كوزقاراسى الدەقايدا ماڭىزدى. بۇگىندە الەمدەگى جولبارىستاردىڭ 75 پايىزى وسى ءۇندىستاندا مەكەن ەتەدى. بۇل جانۋارلار رەسەي مەن وڭتۇستىك-شىعىس ازيادا دا كەڭىنەن تاراعان. زەرتتەۋشىلەر: «ءۇندىستاننىڭ جەتىستىگى وزگە ەلدەرگە ۇلگى بولارى ءسوزسىز»، - دەيدى.
اۆتورلارى: جۋلدىز اتاگەلديەۆا، دانا ەرماك
https://24.kz
