ءۇندىستاندا 17 كۇن تۋننەلدە وتكىزگەن 41 جۇمىسشى قۇتقارىلدى

ءۇندىستان سولتۇستىگىندە قۇتقارۋشىلار گيمالاي تاۋلارىنداعى تۋننەل استىندا قالىپ قويعان جۇمىسشىلاردى شىعارىپ الدى. ولار جەر استىندا 17 كۇن بولدى. Kazinform بۇل تۋرالى BBC-گە سىلتەمە جاساپ حابارلايدى.

گرينۆيچ بويىنشا ساعات 15:30 شاماسىندا ۋتتاراكحاند شتاتىنىڭ ۇكىمەتى بارلىق 41 جۇمىسشى قۇتقارىلعانىن مالىمدەدى.

تۋننەل 17 كۇن بۇرىن 4,5 شاقىرىم تەرەڭدىكتە وپىرىلىپ تۇسكەن بولاتىن.

بيلىك وكىلدەرىنىڭ ايتۋىنشا، جۇمىسشىلار تۋننەلدىڭ ىشىندە قالىپ كەتكەنىمەن، ءۇيىندى استىندا قالماعانى قۋانارلىق جاعداي. ۇزىندىعى ەكى شاقىرىمدى، بيىكتىگى 8,5 مەتردى قۇرايتىن كەڭىستىك ولاردىڭ ءومىر سۇرۋىنە سەپ بولعان.

ءۇيىندىنىڭ العاشقى قاباتى بۇرعىلانعاننان كەيىن-اق ادامدارعا مۇمكىندىگىنشە، تاماق، سۋ جانە وتتەگى جەتكىزىلىپ تۇردى.

قۇتقارۋ وپەراتسياسىنا جۇزدەن استام ادام جۇمىلدىرىلدى. ولاردىڭ مىندەتى - ءۇيىندى اراسىنان بەتون قۇبىردى وتكىزۋ.

قۇتقارۋشىلار سوڭعى بەس مەتردى بۇرعىلاپ بولعاننان كەيىن 57 مەترلىك قۇبىر ارقىلى جۇمىسشىلاردى جەر بەتىنە شىعارا باستادى.

دۇيسەنبى كۇنى قۇتقارۋ وپەراتسياسىنا ءۇندىستاندا «ەگەۋقۇيرىق- شاحتەرلەر» دەپ اتالاتىن ارنايى بولىمشە قوسىلدى. وسى جاساقتىڭ ءتاسىلى، نەگىزىنەن كومىر شاحتالارىندا پايدالانىلادى جانە وتە تار كەڭىستىكتەگى جۇمىسقا ارنالعان.

سيلكيارا تۋننەلى - قۇنى 1,5 ميلليارد دوللار، ۇزىندىعى 890 شاقىرىمدى قۇرايتىن جولدىڭ قۇرىلىسى بويىنشا «چار دحام» جوباسىنىڭ ءبىر بولىگى. تۋننەل يندۋيستەردىڭ ماڭىزدى عيبادات ورىندارىن بايلانىستىرادى. جوبانىڭ كۇردەلىلىگى - ونىڭ گيمالاي تاۋلارىمەن - الەمدەگى ەڭ بيىك ءارى سەيسميكالىق بەلسەندى تاۋلى اۋماقپەن وتۋىندە.

12-قاراشادا وپىرىلىپ تۇسكەن تۋننەلدە 41 جۇمىسشى قالىپ قويعانىن ەسكە سالا كەتەيىك.