ءۇندىستان مەن پاكىستان سوققىلارىن كۇشەيتە ءتۇستى: ەكى تاراپتا دا قازا تاپقاندار سانى ارتىپ كەلەدى
استانا. KAZINFORM - ءۇندىستان مەن پاكىستان ءبىر- ءبىرىن جاڭا شابۋىلدارعا ايىپتاپ، بەيبىت تۇرعىندار اراسىنداعى ونداعان ادامنىڭ قازا تاپقانىن حابارلادى. بۇل ەكى يادرولىق دەرجاۆانىڭ سوڭعى 20 جىلداعى ەڭ شيەلەنىستى قاقتىعىسى بولىپ وتىر، دەپ جازدى Euronews.
ءۇندىستان 22- ساۋىردە كاشميردە 26 تۋريست قازا تاپقان تەراكتىگە جاۋاپ رەتىندە «لاڭكەستىك ينفراقۇرىلىمعا» سوققى بەرىلگەنىن مالىمدەدى. بۇل شابۋىل ءۇشىن بۇرىن بەلگىسىز، ءبىراق پاكىستاندىق «لاشكار- ي- تايبا» ۇيىمىمەن بايلانىسى بار توپ جاۋاپكەرشىلىكتى ءوز موينىنا الدى. ال پاكىستان بۇل ايىپتاۋلاردى جوققا شىعارىپ، سوققىلار بەيبىت اۋىلدار مەن مەشىتتەرگە باعىتتالىپ، سونىڭ سالدارىنان، ونىڭ ىشىندە ءبىر بالا بار، 26 ادام قازا تاپقانىن حابارلادى.
پاكىستان جاۋاپ رەتىندە ءۇندىستاننىڭ بەس ۇشاعىن اتىپ تۇسىرگەنىن مالىمدەدى. ءۇندىستان بۇل مالىمدەمەنى جوققا شىعارىپ، سوققىلار تەك ناقتى نىسانالارعا باعىتتالعانىن ايتتى. ەكى ەل دە كوپتەگەن قۇرباندار مەن زارداپ شەككەندەر تۋرالى حابارلادى.
پاكىستان اۋرۋحانالاردا توتەنشە جاعداي رەجيمىن ەنگىزىپ، ءۇندىستاندىق ديپلوماتتى نارازىلىق رەتىندە شاقىردى. ءۇندىستان پرەمەر- ءمينيسترى نارەندرا مودي مەن پاكىستان پرەمەرى شاحباز شاريف شۇعىل وتىرىستار وتكىزدى. شاريف پاكىستاننىڭ بۇل «سوعىس ارەكەتىنە» جاۋاپ بەرىپ جاتقانىن مالىمدەدى.
حالىقارالىق قاۋىمداستىق الاڭداۋشىلىق ءبىلدىرىپ وتىر. ەۋرووداق، ۇلى بريتانيا، قىتاي سونداي-اق ب ۇ ۇ تاراپتاردى سابىرعا شاقىرىپ، جانجالدى ۋشىقتىرماۋعا جانە تەز ارادا دەەسكالاتسياعا شاقىردى، سەبەبى كەڭ اۋقىمدى سوعىس قاۋپى تۋىنداپ وتىر.
بۇعان دەيىن ءۇندىستان پاكىستان باقىلاۋىنداعى دجاممۋ جانە كاشمير ايماقتارىنا سوققى بەرگەنىن جانە بۇل اۋماقتاردا ءۇندىستانعا قارسى لاڭكەستىك شابۋىلدار جوسپارلانىپ، باسقارىلعان «تەرروريستىك ينفراقۇرىلىم» ورنالاسقانىن مالىمدەگەن ەدى.
