ءۇندىستان پاكىستاننىڭ بىرنەشە ۇشاعىن اتىپ ءتۇسىردى

استانا. KAZINFORM - ءۇندىستاننىڭ قارۋلى كۇشتەرى پاكىستان ۇشاقتارىن ەلدىڭ اۋە كەڭىستىگىنە كىرگىزبەستەن اتىپ ءتۇسىردى. بۇل تۋرالى بريفينگ بارىسىندا اۆياتسيا مارشالى اۆادەش كۋمار بحارتي ءمالىم ەتتى، دەپ حابارلايدى رەسەيلىك ت ا س س.

- ولاردىڭ ۇشاقتارىنىڭ ءبىزدىڭ شەكارامىزدان وتۋىنە مۇمكىندىك بەرمەدىك. ءبىز بىرنەشە ۇشاقتى اتىپ تۇسىردىك، - دەدى ول.

بحارتي ءۇندىستان اسكەري اۋە كۇشتەرىنىڭ شىعىنىنا بايلانىستى سۇراققا جاۋاپ بەرمەدى.

- ءبىز ءالى اسكەري ارەكەت ۇستىندەمىز، ەگەر مەن قازىر بۇل ماسەلەگە قاتىستى قانداي دا ءبىر مالىمەتتەردى بەرەتىن بولسام، بۇل قارسىلاس ءۇشىن باسىمدىق بولادى. ال ءبىز قازىرگى تاڭدا قارسىلاسىمىزعا ەشقانداي باسىمدىق بەرەيىن دەپ وتىرعان جوقپىز. مەنىڭ بار ايتارىم، ءبىز الدىعا قويعان ماقساتىمىزدى ورىندادىق، ءبىزدىڭ ۇشقىشتارىمىزدىڭ بارلىعى ەلگە امان ورالدى، - دەدى ا ا ك وكىلى.

ايتا كەتەيىك، ءۇندىستان مەن پاكىستان اراسىنداعى قارىم- قاتىناس 22 -ءساۋىر كۇنى ءۇندىستاننىڭ وداقتاس دجاممۋ مەن كاشمير اۋماعىنداعى پاحالگام قالاسىندا بولعان تەراكتىدەن كەيىن شيەلەنىستى. تەراكت سالدارىنا 25 ءۇندىستاندىق پەن 4 نەپالدىق مەرت بولدى.

7 -مامىردىڭ تۇنىندە ءۇندىستاننىڭ اسكەري اۋە كۇشتەرى «سيندۋر» وپەراتسياسىن باستاپ، تەرروريستەردىڭ پاكىستانداعى بازالارىنا سوققى جاسادى.

بۇعان جاۋاپ رەتىندە پاكىستان ۇكىمەتى «بانيان ۋل- مارسۋس» (قورعاسىنمەن قاپتالعان قورعان) اتتى كەڭ اۋقىمدى اسكەري وپەراتسيانى باستادى.