ءۇمىت وتە از - توتەنشە جاعدايلار ءمينيسترى جەر استىندا قالعان كەنشىلەر تۋرالى

 توتەنشە جاعدايلار ءمينيسترى سىرىم ءشارىپحانوۆ شاحتاداعى جاعداي تۋرالى وڭىرلىك كوممۋنيكاتسيالار قىزمەتىندە وتكە بريفينگىدە جەر استىندا قالعان كەنشىلەردى قۇتقارۋ مۇمكىندىگى وتە از ەكەنىن ايتتى، دەپ حابارلايدى Kazinform ءتىلشىسى.

قازىرگى ۋاقىتتا كوستەنكو شاحتاسىنىڭ 13 كەنشىسى ءالى دە جەر استىندا. ولار ءىز- ءتۇزسىز جوعالدى دەپ سانالادى جانە ءمينيستردىڭ ايتۋىنشا، ولاردى ءتىرى تابۋ ەكىتالاي.

«ءوزىن- ءوزى قۇتقارۋ ۋاقىتى تەك ءبىر ساعاتقا سوزىلادى. ودان كوپ ۋاقىتقا شىداماۋى مۇمكىن. سوندىقتان قۇتقارۋ مۇمكىندىگى وتە از. ءبىراق ءبىز ءۇمىت ۇزبەيمىز»، - دەدى س. ءشارىپحانوۆ.

كاسىبي اسكەريلەندىرىلگەن اپاتتىق- قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالىنىڭ ديرەكتورى گەننادي سيلينسكيدىڭ ايتۋىنشا، باستاپقىدا شاحتادا باتىس لاۆاسىندا 42 جانە 45 سەكتسيالار اراسىنداعى قازبا بەكىتكىشتەرىنىڭ ارتىندا ءورت تۇتاندى.

بارلىعى 149 سەكسيا بولدى. كاسىبي اسكەريلەندىرىلگەن اپاتتىق- قۇتقارۋ قىزمەتى شاقىرىلعان، اپاتتى جويۋ جوسپارى ەنگىزىلگەن، ادامداردى شاحتالاردان شىعارۋ تۋرالى حابارلاندىرۋ جۇرگىزىلگەن. الايدا 7-8 مينۋتتان كەيىن اۆاريالىق ۋچاسكەدە جارىلىس بولعان.

«جارىلىستىڭ كۇشى سونشالىقتى، باتىس جانە شىعىس بلوكتارىنداعى تەلەكوممۋنيكاتسيا ىستەن شىقتى. سوققى تولقىنى 2 شاقىرىمعا سوزىلىپ، تەك اپاتتىق ايماقتى ەمەس، شىعىس بلوكتا ورنالاسقان k2 لاۆاسىن دا قامتىدى. وسىدان كەيىن شاحتاعا ادامداردى ىزدەۋگە جىبەرىلگەن ءبىرىنشى بولىمشە جەرگىلىكتى ءورت وشاقتارى بار ەكەنىن حابارلادى. سوندىقتان بارلىق كۇشتەر ءالى دە قۇتقارىلۋى مۇمكىن ادامداردى ىزدەۋگە جۇمىلدىرىلدى. ءبىزدىڭ فيليالدىڭ قۇتقارۋشىلارى 5 ادامدى شاحتادان الىپ شىقتى. ولارعا العاشقى كومەك كورسەتىلىپ، مەديتسينالىق مەكەمەگە جەتكىزىلدى. وكىنىشكە وراي، قالعان شاحتەرلەرگە كومەكتەسە المادىق. جەرگىلىكتى ءورت وشاقتارى وقشاۋلاندى. قازىر ىزدەستىرۋ جۇمىستارى جالعاسىپ جاتىر جانە شاحتاداعى گاز جاعدايىنا مونيتورينگ جۇرگىزىلۋدە»، - دەپ تولىقتىردى گەننادي سيلينسكي.