كينوتەاتردا «ءمىرجاقىپ. ويان، قازاق!» فيلمى تاعى ءبىر اپتا كورسەتىلەدى
ەلىمىزدىڭ كينوتەاترلارىندا كورسەتىلىمگە شىققان «ءمىرجاقىپ. ويان، قازاق» فيلمىنىڭ پروكاتى تاعى ءبىر اپتاعا سوزىلدى، دەپ حابارلايدى قازاقپارات Inbusiness.kz-كە سىلتەمە جاساپ.

بۇعان دەيىن الەۋمەتتىك جەلىدە اتالعان فيلمدى كينوتەاترلاردان كورسەتۋ توقتاتىلعانى تۋرالى مالىمەت تاراعان ەدى. كوپ ۇزاماي فيلمنىڭ رەجيسسەرى مۇرات ەسجان Facebook-تەگى پاراقشاسىندا جاعىمدى جاڭالىعىمەن ءبولىستى.
«قالىڭ كورەرمەننىڭ قالاۋى بولىپ، «ءمىرجاقىپ. ويان، قازاق» فيلمىنىڭ كينوتەاترلارداعى كورسەتىلىمى تاعى ءبىر اپتاعا ۇزارتىلدى. ەندى تالابىمىزعا قادامىمىز ساي بوپ، كەلەسى اپتانى دا انشلاگ جاسايىق. كينوتەاترلار دا سۇرانىستى كوردى عوي، مۇمكىن سەانستار سانىن بۇدان دا ۇلعايتار. مەملەكەتتىڭ جۇمساعان قارجىسى اقتالعان العاشقى تاريحي جوبا بولسا دەگەن تىلەك بار»، - دەپ جازدى رەجيسسەر.
ونىڭ ايتۋىنشا، اتالعان فيلم %100 مەملەكەتتىك بيۋدجەتكە تۇسىرىلگەن.
ايتا كەتسەك، «ءمىرجاقىپ. ويان، قازاق!» فيلمى 21-قىركۇيەكتەن باستاپ قالىڭ كورەرمەنگە جول تارتقان ەدى.