ءماجىلىس تۇركى مەملەكەتتەرى ۇيىمىنا قاتىستى قۇجاتتى تالقىلايدى

استانا. KAZINFORM - پارلامەنت ءماجىلىسىنىڭ قاراۋىنا « تۇركى تىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى كەلىپ ءتۇستى.

- اتالعان حاتتاماعا ازەربايجان، قازاقستان، قىرعىزستان، تۇركيا جانە وزبەكستان مەملەكەتتەرىنىڭ باسشىلارى 2022 - جىلعى 11- قاراشادا سامارقاندا وتكەن سامميتتە قول قويدى. حاتتاما 2009 - جىلى جاسالعان « تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە» وزگەرىستەر ەنگىزەدى. ول تۇركىتىلدەس مەملەكەتتەردىڭ ىنتىماقتاستىق كەڭەسىن تۇركى مەملەكەتتەرى ۇيىمىنا اينالدىرۋدى بەكىتەدى. ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتى وسى زاڭ جوباسى بويىنشا قورىتىندى ازىرلەۋگە دايىن، - دەدى دەپۋتات ايگۇل قۇسپان ءماجىلىستىڭ جالپى وتىرىسىندا.

ەسكە سالا كەتەيىك، 2010 - جىلى قىركۇيەكتە پارلامەنت ءماجىلىسى « تۇركى تىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىن راتيفيكاتسيالاۋ تۋرالى» زاڭ جوباسىن ماقۇلدادى.

بۇعان دەيىن حابارلانعانداي، 10-11- قاراشادا سامارقاندا تۇركى مەملەكەتتەرى ۇيىمىنىڭ ءسامميتى ءوتتى.

جيىنعا ازەربايجان، قازاقستان، قىرعىزستان، تۇركيا جانە وزبەكستان باسشىلارى قاتىستى. ماجارستان مەن تۇرىكمەنستان وكىلدەرى سامميتكە باقىلاۋشى رەتىندە كەلدى.

تۇركى كەڭەسى 2009 - جىلى قۇرىلعان. باستاپقىدا ونىڭ قۇرامىنا ازەربايجان، قازاقستان، قىرعىزستان جانە تۇركيا كىردى. وزبەكستان وداققا 2019 - جىلى قوسىلدى. 2021 - جىلدىڭ قاراشاسىندا كەڭەس تۇركى مەملەكەتتەرىنىڭ ۇيىمى بولىپ وزگەردى.

2022 - جىلى وزبەكستانداعى سامميت بارىسىندا بىرنەشە قۇجاتقا قول قويىلدى.