ءماجىلىس ت م د ەلدەرىندە قاۋىپتى اۋرۋلارمەن كۇرەسكە قاتىستى زاڭدى قابىلدادى

بۇگىن ءماجىلىستىڭ جالپى وتىرىسىندا «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ اۋماقتارىن سانيتاريالىق قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى Kazinform.

قۇجاتقا 2021-جىلعى 28- مامىردا مينسك قالاسىندا قول قويىلعان.

«بۇل كەلىسىمگە 11 ەلدىڭ 8 ءى قول قويدى. قۇجات اياسىندا اسا قاۋىپتى اۋرۋلارعا، ياعني توتەنشە جاعدايعا قاتىستى ينفەكسيالىق ىندەتتەردىڭ تارالۋىنا جول بەرمەۋ جونىندەگى كەلىسىلگەن ءىس-شارالاردى اتقارۋ قاراستىرىلعان. اۋرۋلاردىڭ تولىق تىزبەسى وسى كەلىسىمگە قوسىمشادا ايقىندالعان. بۇدان باسقا، كەلىسىم حالىقتىڭ دەنساۋلىعى ءۇشىن قاۋىپتى جانە توتەنشە جاعدايلاردىڭ بولۋى مۇمكىندىگىمەن بايلانىستى تاۋارلاردىڭ جەتكىزىلۋىن بولدىرماۋعا باعىتتالعان»، - دەدى دەنساۋلىق ساقتاۋ ءمينيسترى اجار عينيات.

ونىڭ ايتۋىنشا، اسا قاۋىپتى ينفەكتسيالىق اۋرۋلارعا قاتىستى ماسەلەلەر بويىنشا ەلدەردىڭ ءوزارا ءىس-قيمىلىن ۇيلەستىرۋ ت م د- عا مۇشە مەملەكەتتەردىڭ باس مەملەكەتتىك سانيتاريالىق دارىگەرلەرىنىڭ كەڭەسىنە جۇكتەلەدى.

«كەلىسىمدە مەملەكەتتەردىڭ ءوتىنىشى بويىنشا وسىنداي اۋرۋلار مەن تاۋارلاردى انىقتاۋ جانە تارالۋ جاعدايلارى تۋرالى بارلىعىن جەدەل حاباردار ەتۋ، سونداي-اق ەپيدەمياعا قارسى ءىس-شارالاردى جۇرگىزۋ ءۇشىن پراكتيكالىق، تەحنيكالىق كومەك كورسەتۋ بويىنشا ت م د ەلدەرىنىڭ مىندەتتەمەلەرى ايقىندالعان»، - دەدى مينيستر.