ءماجىلىس مەملەكەتتىك ساتىپ الۋ تۋرالى زاڭدى قابىلدادى

استانا. KAZINFORM - ءماجىلىس «مەملەكەتتىك ساتىپ الۋ تۋرالى» قازاقستان رەسپۋبليكاسى زاڭىنىڭ جوباسىن ەكىنشى وقىلىمدا قابىلدادى.

«مەملەكەتتىك ساتىپ الۋ تۋرالى» قازاقستان رەسپۋبليكاسى زاڭىنىڭ جوباسى پرەزيدەنتتىڭ 2022 -جىلعى 26-قاراشاداعى جارلىعىمەن بەكىتىلگەن.

قازاقستان رەسپۋبليكاسى پرەزيدەنتىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارىنىڭ 43-تارماعىن ىسكە اسىرۋ ماقساتىندا ازىرلەندى.

زاڭ جوباسى ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ ساپاسىن ارتتىرۋعا، مەملەكەتتىك ساتىپ الۋ راسىمدەرىن وڭايلاتۋعا جانە ودان ءارى اۆتوماتتاندىرۋعا، ساتىپ الۋدىڭ ءبىرىڭعاي پلاتفورماسىن قۇرۋعا باعىتتالعان.

زاڭ جوباسىندا مىنالار كوزدەلەدى:

«مەملەكەتتىك ساتىپ الۋدىڭ قوعامدىق مونيتورينگى» ۇعىمىن ەنگىزۋ جانە ول بويىنشا نورمالاردى رەگلامەنتتەۋ؛

الەۋمەتتىك، ەكونوميكالىق جانە ەكولوگيالىق اسپەكتىلەردى ەسكەرە وتىرىپ، تاۋارلاردى، جۇمىستاردى، كورسەتىلەتىن قىزمەتتەردى ساتىپ الۋعا نەگىزدەلگەن «تۇراقتى مەملەكەتتىك ساتىپ الۋ» ينستيتۋتىن ەنگىزۋ؛

الەۋەتتى ءونىم بەرۋشىلەردىڭ رەيتينگىن ەنگىزۋ؛

مەملەكەتتىك ساتىپ الۋدى جۇزەگە اسىرۋ تاسىلدەرىن، مەملەكەتتىك ساتىپ الۋدىڭ نەگىزگى قاعيداتتارىن جانە الەۋەتتى ءونىم بەرۋشىگە قويىلاتىن بىلىكتىلىك تالاپتارىن رەگلامەنتتەۋ.

بۇل زاڭ جوباسى 2024 -جىلعى 3-ساۋىردە ءبىرىنشى وقىلىمدا ماقۇلداندى.

زاڭ جوباسىمەن جۇمىس ىستەۋ بارىسىندا دەپۋتاتتار مەملەكەت باسشىسىنىڭ تاپسىرمالارىن ىسكە اسىرۋ بويىنشا تۇزەتۋلەر ەنگىزدى جانە مىنالاردى ۇسىنادى:

- EPC- كەلىسىمشارتتارىن ەنگىزۋ. بۇل وبەكتىنى سالۋ جانە ونى پايدالانۋعا بەرۋ بويىنشا تولىق اياقتالعان قۇرىلىستىڭ كەشەندى جۇمىستارى؛
- مەملەكەتتىك ساتىپ الۋدا وفتەيك- كەلىسىمشارتتار ارقىلى وتاندىق وندىرۋشىلەردى قولداۋ؛
- مەرزىمدەردى بۇزعانى جانە جۇمىستاردى ءتيىستى ساپادا جاساماعانى ءۇشىن ءونىم بەرۋشىلەردىڭ جاۋاپكەرشىلىگىن كۇشەيتۋ (ءونىم بەرۋشىدەن تۇراقسىزدىق ايىبىن ءوندىرىپ الۋ، ءونىم بەرۋشىنى مەملەكەتتىك ساتىپ الۋعا جوسىقسىز قاتىسۋشىلار تىزىلىمىنە ەنگىزۋ).

سونداي-اق:
- قوسالقى مەردىگەرلىككە بەرىلەتىن جۇمىستاردىڭ شەكتى كولەمىن ازايتۋعا (%50 دان %30 عا دەيىن)، سونداي-اق كونكۋرستا مالىمدەلمەگەن قوسالقى مەردىگەرلەردى تارتۋعا تىيىم سالۋعا؛

- مەملەكەتتىك ساتىپ الۋ قورىتىندىلارىنا شاعىم جاساۋ ءتارتىبىن ناقتىلاۋعا باعىتتالعان تۇزەتۋلەر ەنگىزىلدى.

اۋىلدىق اكىمدىكتەردىڭ جەدەلدىگى جانە دەربەستىگىن ارتتىرۋ ءۇشىن ءبىر كوزدەن الۋ تاسىلىمەن ساتىپ الۋدىڭ شەكتى ءمانىن ۇلعايتۋ ۇسىنىلادى (3000 نان 4000 ايلىق ەسەپتىك كورسەتكىشكە دەيىن) .

بۇدان باسقا، جەكەلەگەن نورمالاردى ناقتىلايتىن جانە زاڭ جوباسىنىڭ مازمۇنىن جاقسارتاتىن، سونداي-اق زاڭ تەحنيكاسىنىڭ تالاپتارىنا سايكەس كەلتىرۋ جونىندە تۇزەتۋلەر ەنگىزىلدى.

پارلامەنت ءماجىلىسىنىڭ كوميتەتتەرى زاڭ جوباسى بويىنشا قورىتىندىلار بەردى.

اۆتور
داۋلەت ىزتىلەۋ