ءماجىلىس جاڭا قۇرىلىس كودەكسىنىڭ جوباسىن ءبىرىنشى وقىلىمدا ماقۇلدادى
استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا قۇرىلىس كودەكسىنىڭ جوباسى مەن ىلەسپە قۇجات ءبىرىنشى وقىلىمدا ماقۇلداندى.
ق ر ونەركاسىپ جانە قۇرىلىس ءمينيسترى ەرسايىن ناعاسپايەۆتىڭ سوزىنە قاراعاندا، كودەكس اياسىندا قۇرىلىس جوبالارىنىڭ ورىندالۋىن قوسىمشا باقىلاۋ ءۇشىن مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسىن ەنگىزۋ كوزدەلىپ وتىر.
سونىمەن قاتار ۇلتتىق قاۋىپسىزدىك پەن ورنىقتى دامۋدى قامتاماسىز ەتۋ ماقساتىندا جاڭا قۇرىلىس كودەكسىندە سەيسميكالىق ماسەلەگە ارنالعان جەكە تاراۋ ەنگىزىلەدى. نورمالار كەشەندى تۇردە سەيسميكالىق قاتەردى باعالاۋدى، جاڭا نىسانداردى سەيسمو-وقشاۋلاۋ تەحنولوگياسىمەن جوبالاۋدى، قۇرىلىس الاڭدارىن تاڭداۋ مەن ءبىرىنشى دەڭگەيدەگى ماڭىزدى نىساندارعا ينجەنەرلىك-سەيسمومەتريالىق باقىلاۋ جۇرگىزۋدى قاراستىرادى.
قاۋىپتى باعالاۋ - ايماقتىڭ ەرەكشەلىگى مەن نىسانداردىڭ سيپاتىنا قاراي ىقتيمال شىعىنداردى ەسەپتەۋ، تاۋەكەل كارتالارىن جاساۋ، عيماراتتاردىڭ توزىمدىلىگىن باعالاۋ مەن ءقاۋىپتى وڭىرلەردەگى نىسانداردى تەحنيكالىق پاسپورتتاۋدى قامتيدى. بۇل جەردە سەيسميكالىق ميكروايماقتارعا ءبولۋ ەرەكشە ماڭىزعا يە. ونىڭ كارتالارى قالا قۇرىلىسىن جوسپارلاۋ كەزىندە مىندەتتى تۇردە پايدالانىلاتىن بولادى. سوندىقتان، جاڭا كودەكسكە سەيسميكالىق قاۋىپسىزدىك ءبولىمىن ەنگىزۋ ستراتەگيالىق ماڭىزدى قادام.
بۇدان بولەك، تاعى ءبىر وزەكتى ماسەلە ول - قازىرگى اتتەستاتتاۋ ءتارتىبى ساراپشىلار مەن ينجەنەرلەردىڭ ناقتى بىلىكتىلىك دەڭگەيىن تولىق ءارى ءتيىمدى كورسەتە الماي وتىر. وسىعان بايلانىستى نەگىزگى حالىقارالىق تاجىريبەنى، سونىڭ ىشىندە ەۋروپا وداعىنىڭ وزىق تاجىريبەسىنە سۇيەنە وتىرىپ، قۇرىلىس ينجەنەرلەرىن سەرتيفيكاتتاۋ جۇيەسىن ەنگىزۋ جوسپارلانعان.
مۇنىمەن قوسا، سالاداعى نورماتيۆتىك بازانى تۇراقتى تۇردە جاڭارتىپ، زامانعا بەيىمدەۋ ماقساتىندا جاڭا قۇرىلىس كودەكسىندە تەحنيكالىق نورمالاۋ جۇيەسىنە ەرەكشە نازار اۋدارىلدى. كودەكس اياسىندا ۇلتتىق تەحنيكالىق نورمالاۋ ينستيتۋتىن قۇرۋ جوسپارلاندى. ول نورماتيۆتىك- قۇقىقتىق بازانى جەتىلدىرۋ ءىسىن ءوز قولىنا الادى.
بۇل ورگان نورماتيۆتەردىڭ قالاي قولدانىلىپ جاتقانىن باقىلاپ، قاجەت بولعان جاعدايدا تۇسىندىرمە بەرەدى، جاڭا تەحنولوگيالار مەن تاجىريبەلەردى ەسكەرىپ، وزگەرىستەر ۇسىنادى.
بۇدان باسقا، قۇرىلىس، ساۋلەت، ينجەنەرلىك جۇيەلەر، قۇرىلىس ماتەريالدارى سياقتى باعىتتار بويىنشا ارنايى تەحنيكالىق كوميتەتتەر قۇرۋ ەسكەرىلگەن. بۇل كوميتەتتەرگە كاسىبي ماماندار، عىلىمي ۇيىمدار، بيزنەس وكىلدەرى مەن مەملەكەتتىك ورگاندار قاتىسادى.
جاڭا قۇرىلىس كودەكسى اياسىندا باقىلاۋ مەن قاداعالاۋدى كۇشەيتۋگە باعىتتالعان جاڭا تاسىلدەر ازىرلەندى. قۇرىلىس ساپاسىن قاتاڭ قاداعالاۋ ءۇشىن باقىلاۋ ورگاندارىنىڭ قاتىسۋىمەن قۇرىلىس بارىسى «جوسپارلى ينسپەكتسيالاۋ» ارقىلى باسىنان باستاپ، پايدالانۋعا بەرىلگەنگە دەيىن تەكسەرىلەدى.
ءمينيستردىڭ ايتۋىنشا، ەندى پروفيلاكتيكالىق باقىلاۋ قاشىقتان، ياعني وبەكتىگە بارماي- اق جۇرگىزىلەتىن بولادى. بۇل ءۇشىن مەملەكەتتىك ورگانداردىڭ دەرەكتەرى مەن اقپاراتتىق جۇيەلەر پايدالانىلادى، قاجەت بولعان جاعدايدا دەرەۋ شارا قابىلدانادى. سونىمەن قاتار، اكىمدىكتەردىڭ جۇمىسىنا دا باقىلاۋ ارتىپ، زاڭ بۇزۋدى الدىن الۋ شارالارى كۇشەيتىلەدى.
- قۇرىلىس كودەكسى جوباسىندا نىساندى قابىلداۋ كەزىندە مەملەكەتتىك ساۋلەت- قۇرىلىس باقىلاۋ مەن توتەنشە جاعداي ورگاندارىنىڭ مىندەتتى تۇردە قاتىسۋى قاراستىرىلعان. ولار نىساننىڭ پايدالانۋعا دايىن ەكەندىگى تۋرالى قورىتىندى بەرەدى. جاڭا زاڭنامالىق وزگەرىستەر قۇرىلىس تسيكلىنىڭ باسىنان اياعىنا دەيىن مەملەكەتتىك باقىلاۋدى كۇشەيتۋدى كوزدەپ وتىر، - دەدى مينيستر.
كودەكستە مەملەكەتتىك اقپاراتتىق مادەلدەر بانكى فۋنكتسيونالىن كەڭەيتۋ نەگىزىندە ءبىرىڭعاي قۇرىلىس پورتالىن قۇرۋ كوزدەلگەن، ياعني قۇرىلىس سالاسىنداعى بارلىق قىزمەتتەر «ءبىر تەرەزە» قاعيداتى بويىنشا كورسەتىلەتىن بولادى.
بۇدان بۇرىن حابارلانعانداي، دەپۋتات باقىتجان بازاربەك جاڭا قۇرىلىس كودەكسىنىڭ جوباسىندا ادام قاۋىپسىزدىگى ءبىرىنشى ورىندا بولاتىنىن ايتقان ەدى.
