ءماجىلىس دەپۋتاتى وتباسىندا ءجيى جانجال شىعاراتىنداردىڭ ءتىزىمىن جاساۋدى ۇسىندى
ءماجىلىس دەپۋتاتى باقىتجان بازاربەك وتباسىنا مازا بەرمەيتىندەردىڭ جانە ماسىلداردىڭ ءتىزىلىمىن (رەەستر) جاساۋدى ۇسىندى، دەپ حابارلايدى قازاقپارات ءتىلشىسى.

«بارلىعى زورلىق-زومبىلىق كورسەتۋشىلەرگە جازانى كۇشەيتكەنىن قالايدى. وسى ورايدا مەن وتباسىلىق زورلىق-زومبىلىققا قاتىستى قىلمىستىق كودەكستە جازانى اۋىرلاتۋدى ۇسىندىم. مەنىڭ ويىمشا، جازانى كۇشەيتسەك، وتباسىلىق جانجال شىعارۋشىلار بىرنەشە رەت ويلانادى. سونىمەن قاتار، وتباسىنا مازا بەرمەيتىندەردىڭ جانە ماسىلداردىڭ ءتىزىلىمىن (رەەستر) جاساۋدى ۇسىندىم. بۇل ءتيىمدى شارا، بىزدە بۇل تاجىريبە بار، مىسالى، اليمەنت تولەۋدەن جالتارىپ جۇرگەندەردىڭ، جەر ۋچاسكەلەرىن ماقساتىنا ساي پايدالانبايتىن ادامداردىڭ ءتىزىلىمى بار. ولار ءۇش جىل ىشىندە جەر ۋچاسكەسىن الۋ مۇمكىندىگىنەن ايىرىلادى»، - دەدى باقىتجان بازاربەك ءماجىلىستىڭ زاڭناما جانە سوت-قۇقىقتىق رەفورما كوميتەتىندە وتكەن وتىرىستا.
ونىڭ ايتۋىنشا، وتباسىلىق بۇزاقىلاردىڭ ءتىزىلىمىن قۇرۋ ادام پسيحولوگياسىنا قاتتى اسەر ەتەدى.
«زاڭ تالاپتارىن بۇزعان ادام، ءوزىن تىزىلىمنەن شىعارۋعا تىرىسادى. ءبىز زورلىق كورسەتۋشىنىڭ پسيحوتيپىن زەرتتەۋىمىز كەرەك. وتباسىندا جانجال شىعارۋشىلاردىڭ ارەكەتى پاتولوگيا ەمەس، ول ومىردەن شارشاپ، ايەلى مەن بالالارىنان باس تارتاتىن قاراپايىم ازامات. بالالار كوبىنە ۇندەي المايدى، كەيبىرى وتباسىنداعى جاعدايدى الەۋمەتىك جەلىگە جازۋى مۇمكىن. ءبىراق ولاردىڭ ءۇنى جەتە بەرمەيدى. ءبىز بالالار مەن ايەلدەردىڭ قۇقىعىن زورلىق كورسەتۋشىلەردەن قورعاۋىمىز كەرەك»، - دەيدى حالىق قالاۋلىسى.