ءماجىلىس دەپۋتاتى جەكەمەنشىك مەكتەپتەردىڭ پروبلەماسىن اتادى

استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا دەپۋتات جۇلدىز سۇلەيمەنوۆا جەكەمەنشىك مەكتەپتەردەگى ماسەلەنى كوتەردى.

«بۇگىنگى ساۋالدا جەكەمەنشىك مەكتەپتەرگە مەملەكەتتىك تاپسىرىستى ورنالاستىرۋدىڭ ءبىرقاتار ماسەلەسىنە توقتالعىم كەلەدى. بىرىنشىدەن، مەملەكەتتىك تاپسىرىستى ورنالاستىرۋ مەحانيزمىن قايتا قاراۋ قاجەت دەپ سانايمىز. سەبەبى، قازىرگى جۇيەدە ءار بالاعا ارنالعان قارجى جالپى سيپاتتاعى ترانسفەرتتەر (ت و ح) بويىنشا قاراستىرىلادى. الايدا، قانداي دا ءبىر سەبەپتەرمەن جەكەمەنشىك مەكتەپتەرگە بولىنەتىن قاراجات رەسپۋبليكالىق بيۋدجەتكە جۇكتەلگەن، ال وڭىرلەردەگى بالالار سانى وزگەرىسسىز جەرگىلىكتى اتقارۋشى بيلىك ورگاندارىندا، ياعني ءبىلىم باسقارمالارىندا قالىپ وتىر. بۇل دەگەنىمىز، وڭىرلەردە بالالاردى مەملەكەتتىك مەكتەپتەردەن جەكەمەنشىك مەكتەپتەرگە اۋىستىرا وتىرىپ، قارجىنى وزدەرىنە قالدىرىپ وتىر. مۇنداي جاعدايدا قارجىنىڭ ءادىل ءبولىنۋىن قامتاماسىز ەتۋ ءۇشىن جاڭا مەحانيزمدى ەنگىزۋ قاجەت»، - دەدى ج. سۇلەيمەنوۆا ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.

ونىڭ ايتۋىنشا، بارلىق بالالار تەڭ دارەجەدە ساپالى ءبىلىم الۋىنا مۇمكىندىك قاراستىرىلىپ، جەكەمەنشىك مەكتەپتەردە مەملەكەتتىك تاپسىرىس بالالاردىڭ وقۋلىعىن جانە ىستىق تاماقپەن قامتىلۋى پروبلەماسىن شەشۋگە باعىتتالۋى ءتيىس.

مەملەكەتتىك ءبىلىم بەرۋ تاپسىرىسى 677 جەكەمەنشىك مەكتەپتە 251,3 مىڭ وقۋشىنى قامتىپ، 2024 -جىلى رەسپۋبليكالىق بيۋدجەتتەن 133,9 ميلليارد تەڭگە كولەمىندە قاراجات ءبولىندى. الايدا، 2024 -جىلدىڭ 1-تامىزىنداعى جاعداي بويىنشا بۇل سومانىڭ 103,5 ميلليارد تەڭگەسى يگەرىلگەن، قالعان 30,4 ميلليارد تەڭگە تەك 1 ايعا قارجىلاندىرۋعا جەتكىلىكتى. 2024-2025 -جىلعا جەكەمەنشىك مەكتەپتەرگە قوسىمشا قاراجات ءبولۋ ماسەلەسى رەسپۋبليكالىق بيۋدجەتتىڭ ناقتىلاۋى بولماعاندىقتان، شەشىلمەي تۇر.

«2023 -جىلدىڭ قورىتىندىسى بويىنشا 1,4 ميلليارد تەڭگە كولەمىندە كرەديتورلىق قارىز بار. بۇل ماسەلەنى شەشۋ ءۇشىن 2024 -جىلدىڭ قاڭتارىندا قوسىمشا قاراجات بولۋگە ءوتىنىم دايىندالعان، ءالى كۇنگە دەيىن شەشىم قابىلدانبادى. بۇدان بولەك، جەكەمەنشىك مەكتەپتەردە دە ءبىلىم ساپاسى، مۇعالىمدەردىڭ كاسىبي بىلىكتىلىگى، ءتارتىبى مەن تاربيەسىن قاداعالايتىن جۇيە بولۋى قاجەت. مۇنداي جۇيە وقۋشىلاردىڭ جان-جاقتى دامۋىنا، ءبىلىم الۋ دەڭگەيىنىڭ جوعارى بولۋىنا، سونداي-اق مۇعالىمدەردىڭ كاسىبي وسۋىنە ىقپال ەتەدى. جەكەمەنشىك ءبىلىم بەرۋ مەكەمەلەرى دە مەملەكەتتىك مەكتەپتەر سياقتى ساپالى ءبىلىم بەرۋگە جانە ۇرپاق تاربيەلەۋگە جاۋاپتى ەكەنىن ەسكەرۋ قاجەت. كەيىنگى ءتورت جىلدا جەكەمەنشىك مەكتەپتەر اشۋ ءۇشىن كوپتەگەن ينۆەستور ەكىنشى دەڭگەيلى بانكتەردەن زاەمدىق قاراجات تارتقان، جەكەمەنشىك مەكتەپتەر ەلىمىزدەگى 3 اۋىسىمدى مەكتەپتەر پروبلەماسىن شەشۋدە ايتارلىقتاي كومەك بولدى»، - دەدى دەپۋتات.

اۆتور
رۋسلان عابباسوۆ