ءماجىلىس دەپۋتاتى ءوز ەركىمەن وكىلەتتىگىن توقتاتتى
استانا. KAZINFORM - پارلامەنتى ءماجىلىسىنىڭ دەپۋتاتى، Respublica فراكسياسىنىڭ مۇشەسى دينارا شۇكىجانوۆا ءوز وكىلەتتىگىن توقتاتۋ تۋرالى ءوتىنىش بەردى. بۇل تۋرالى ورتالىق سايلاۋ كوميسسياسى حابارلادى.
«ق ر كونستيتۋتسياسىنىڭ 52-بابىنا، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» 1995-جىلعى 16- قازانداعى ق ر كونستيتۋتسيالىق زاڭىنىڭ 24-بابى 3 جانە 8-تارماقتارىنا سايكەس، ق ر ورتالىق سايلاۋ كوميسسياسى قاۋلى ەتەدى: ق ر پارلامەنتى ءماجىلىسىنىڭ دەپۋتاتى دينارا امانجەل قىزى شۇكىجانوۆانىڭ ءوتىنىش بەرۋىنە بايلانىستى ونىڭ وكىلەتتىگىن مەرزىمىنەن بۇرىن توقتاتۋعا اكەلەتىن نەگىز تۋىندادى دەپ بەلگىلەنسىن. ق ر پارلامەنتى ءماجىلىسىنىڭ دەپۋتاتى د. ا. شۇكىجانوۆانىڭ وكىلەتتىگىن مەرزىمىنەن بۇرىن توقتاتۋ تۋرالى ۇسىنىم ماجىلىسكە ەنگىزىلسىن»، - دەپ جازىلعان قاۋلىدا.
ايتا كەتەيىك، دينارا شۇكىجانوۆا 2023-جىلى Respublica پارتياسىنىڭ تەڭ ءتوراعاسى، ماجىلىستە ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى بولدى.
