ءماجىلىس دەپۋتاتى اپورت الماسى مەن قىزعالداقتى ۇلتتىق برەند ەتۋدى ۇسىندى
استانا. KAZINFORM - ءماجىلىس دەپۋتاتى امانجول التايەۆ الماتىنىڭ اپورت الماسى مەن قىزعالداقتى رەسمي تۇردە وتاندىق ماقتانىش، برەند ەتىپ بەكىتۋدى ۇسىنىپ وتىر.
«وتاندىق تۇقىم وسىرۋشىلەردى قولداۋىمىز كەرەك. مەملەكەت تاراپىنان قولداۋ كورمەي وتىرعان تۇقىم شارۋاشىلىعىمەن اينالىساتىن فەرمەرلەردى قولداۋ قاجەت. مىسالى، قاراعاندى وبلىسىنداعى «استرو-اگرو» ج ش س، بۇل مەكەمە جىلدار بويى كارتوپتى عىلىمي تۇرعىدان زەردەلەپ كەلەدى، ءبىراق، وكىنىشكە قاراي، مەملەكەت تاراپىنان قولداۋ كورمەي كەلە جاتىر»، - دەدى امانجول التايەۆ ءماجىلىس قابىرعاسىندا وتكەن جيىن بارىسىندا.
وسى ورايدا، حالىق قالاۋلىسى شەتەل تاجىريبەسىن ۇلگى ەتتى.
«وسىمدىكتەردىڭ جاڭا سورتتارىن قورعاۋ جونىندەگى حالىقارالىق وداققا مۇشە بولۋعا قاتىستى بىلتىر ارىپتەستەرىمىزبەن نيدەرلاندىدا بولدىق. بايقاعانىمىز، تۇقىم شارۋاشىلىعى سالاسىندا بىزدەن ءبىراز وزعان، ونى مويىنداۋىمىز كەرەك. ەندى ءبىز وسى وداققا مۇشە بولۋ ارقىلى، سولاردىڭ تاجىريبەسىنە سۇيەنە وتىرىپ، وتاندىق تۇقىم شارۋاشىلىعىنا جول اشۋىمىز كەرەك. تۇقىم شارۋاشىلىعى سالاسىندا ۇلتتىق برەندكە قاتىستى ۇسىنىستار بار. مىسالى، نيدەرلاندىداعى قىزعالداقتىڭ وتانى - قازاقستان. قىزعالداقتى وزىمىزدە ءوسىرىپ، ۇلتتىق برەندكە اينالدىرۋعا بولادى. وسى ماسەلەنى قولعا الساق. ودان بولەك، الماتىنىڭ اپورت الماسى، قازىر بالا كەزىمىزدەگى اپورتتان ايرىلىپ قالدىق»، - دەيدى ول.
وسىلايشا، امانجول التايەۆ قىزعالداق پەن اپورت الماسىن ۇلتتىق ماقتانىشقا اينالدىرۋدى ۇسىندى.
بۇگىن ءماجىلىستىڭ اگرارلىق ماسەلەلەر كوميتەتىندە «تۇقىم شارۋاشىلىعىن دامىتۋ. وسىمدىكتەردىڭ جاڭا سورتتارىن قورعاۋ جونىندەگى حالىقارالىق وداققا مۇشە بولۋ» تاقىرىبىندا دوڭگەلەك ۇستەل ءوتتى.
ايتا كەتەيىك، سونداي-اق بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ اۋماقتىق قورعانىسى تۋرالى» زاڭى مەن ىلەسپە قۇجات ءبىرىنشى وقىلىمدا ماقۇلداندى.
