ءماجىلىس دەپۋتاتى ارقالىق قالاسىنا اۋەجاي سالۋدى ۇسىندى
ارقالىق قالاسىنا قايتادان اۋەجاي سالۋ كەرەك. بۇل تۋرالى ۇكىمەت باسشىسىنىڭ ءبىرىنشى ورىنباسارى رومان سكلياردىڭ اتىنا ساۋال جولداعان ءماجىلىس دەپۋتاتى بەرىك بەيسەنعاليەۆ ايتتى، دەپ حابارلايدى Kazinform.
«وسى جىلدىڭ 19- جەلتوقسانىندا كولىك ءمينيسترى تاياۋداعى 2-3 جىلدا بالقاش پەن ءۇرجاردىڭ اۋەجايلارىنا جاڭعىرتۋ جوسپارلانىپ وتىرعانىن، سونداي-اق، قارقارالى مەن ۇلىتاۋدا، زايسان مەن كاتونقاراعايدا اۋەجايلار سالۋ ماسەلەسى پىسىقتالۋدا دەپ حابارلادى. جوندەۋ مەن قۇرىلىسقا بارلىعى 71 ميلليارد تەڭگە جۇمسالاتىن بولادى. ارينە، مينيسترلىكتىڭ بۇل باستامالارى كولىك لوگيستيكاسىنىڭ دامۋىنا عانا ەمەس، وسى وڭىرلەردىڭ الەۋمەتتىك-ەكونوميكالىق دامۋىنا دا وڭ اسەرىن تيگىزەتىنى ءسوزسىز. وسىعان بايلانىستى، «AMANAT» پارتياسىنىڭ قوستاناي وبلىسىندا ارقالىق قالاسى مەن شالعايداعى امانگەلدى جانە جانگەلدين اۋداندارىنىڭ تۇرعىندارىمەن كەزدەسۋلەرى بارىسىندا كوپتەن بەرى تۇراقتى تۇردە كوتەرىلىپ جۇرگەن ارقالىقتا دا اۋەجاي سالۋ قاجەتتىلىگىن ەسكە سالعىم كەلىپ وتىر»، - دەدى ءماجىلىس دەپۋتاتى.
ونىڭ اتاپ وتۋىنشە، بۇرىن ارقالىق تورعاي وبلىسىنىڭ ورتالىعى بولىپ تۇرعان كەزدە وندا ۇلكەن اۋە كەمەلەرىن قابىلداي الاتىن اۋەجاي بولعان. وبلىس جابىلىپ قالعان سوڭ، مۇلتىكسىز جۇمىس ىستەپ تۇرعان نىسان سول كەزدەگى بيلىك پەن قازاقستاننىڭ اۋە اكىمشىلىگىنىڭ قاراۋىنسىز قالىپ، اقىر سوڭى جەكەگە ساتىلىپ، شارۋاسى بىتكەن. بۇگىندە اۋە قاتىناسىنىڭ بولماۋى ءوڭىردىڭ تولىققاندى الەۋمەتتىك-ەكونوميكالىق دامۋىنا كەدەرگى كەلتىرىپ وتىر.
«وسىعان وراي، ءوڭىردىڭ الەۋمەتتىك-ەكونوميكالىق دامۋى جانە ءوڭىرارالىق بايلانىستاردى كۇشەيتۋ ءۇشىن كولىك مينيسترلىگىنە ارقالىق قالاسىندا اۋەجايدى قايتا سالۋ ماسەلەسىن پىسىقتاۋدى، كەيىننەن وسى باعىتتا اۋە قاتىناسىن اشۋدى تاپسىرۋدى سۇرايمىن»، - دەدى بەرىك بەيسەنعاليەۆ.
