ءماجىلىس ءتوراعاسى قۇمار ويىنعا قارسى زاڭ تۋرالى: قوعامنىڭ تاعى ءبىر دەرتىنە توسقاۋىل قويىلدى

استانا. KAZINFORM - ءماجىلىس ءتوراعاسى ەرلان قوشانوۆ الەۋمەتتىك جەلىدەگى پاراقشاسىندا پرەزيدەنت بۇگىن قول قويعان لۋدومانياعا قارسى زاڭ تۋرالى پىكىر ءبىلدىردى.

«بۇگىن پرەزيدەنت كوپتەن كۇتىپ جۇرگەن زاڭنىڭ ءبىرى - لۋدومانياعا قارسى تۇزەتۋلەرگە قول قويدى. بۇل قۇبىلىستان ءتونىپ تۇرعان قاۋىپتىڭ اۋقىمى تۋرالى قاسىم-جومارت كەمەل ۇلى تالاي رەت ايتتى. 2023 -جىلدىڭ كۇزىندە وسى ماسەلە بويىنشا قاۋىپسىزدىك كەڭەسىنىڭ ارنايى وتىرىسى دا وتكەن بولاتىن. سول كەزدە ازاماتتار اراسىنداعى قۇمار ويىنعا تاۋەلدىلىكپەن كۇرەسكە باعىتتالعان زاڭنامانى، ۇيىمداستىرۋشىلىق جانە اقپاراتتىق-يدەولوگيالىق شارالار كەشەنىن قابىلداۋ تۋرالى تاپسىرما بەرىلدى. بيىلعى ناۋرىزدا وتكەن ۇلتتىق قۇرىلتاي وتىرىسىندا مەملەكەت باسشىسى لۋدومانيانى بۇگىنگى قازاقستاننىڭ بەس الەۋمەتتىك پروبلەماسىنىڭ ءبىرى دەپ اتادى. ەڭ قورقىنىشتىسى، ويىنعا دەگەن تاۋەلدىلىك جاستاردىڭ اراسىندا قاتتى تاراپ جاتىر. وتباسىلاردىڭ اجىراسۋىنا، ءتۇرلى قىلمىستاردىڭ باستاپقى سەبەبىنە اينالىپ وتىر»، - دەپ جازادى ءماجىلىس سپيكەرى.

سونداي-اق، ول لۋدومانيا تەك قازاقستاندىقتار ءۇشىن ەمەس، الەم حالقى ءۇشىن وزەكتى ماسەلەگە اينالعانىن ەسكە سالادى.

«بۇل جاڭا زاڭ ارقىلى مەملەكەت اتالعان الەۋمەتتىك كەسەلگە توسقاۋىل قويىپ وتىر. بىرىنشىدەن، بۋكمەكەرلىك كەڭسەلەر مەن توتاليزاتورلاردىڭ جارناماسى شەكتەلەدى. عيماراتتاردىڭ سىرتىنداعى، ماسس- مەدياداعى، كينو مەن ۆيدەوداعى، انىقتامالىق قىزمەتتەردەگى، SMS تاراتۋلار ارقىلى جاسالاتىن قۇمار ويىن جارناماسىنا تىيىم سالىندى. ەكىنشىدەن، زاڭ ءبىرىڭعاي تىزىلىمدەگى بورىشتىلارعا، 21 گە كەلمەگەن ازاماتتارعا، ءوز-ءوزىن قۇمار ويىن مەن ءباس تىگۋدەن شەكتەيتىنىن ءمالىم ەتكەن ادامدارعا قۇمار ويىنعا قاتىسۋعا تىيىم سالادى. سونداي-اق، مەملەكەتتىك قىزمەتشىلەر مەن اسكەري قىزمەتشىلەرگە، ارنايى مەملەكەتتىك ورگان وكىلدەرىنە دە قۇمار ويىنعا قاتىسۋعا تىيىم سالىندى. بۇل تالاپ بۇزىلسا، جۇمىستان قۋىلادى»، - دەيدى ەرلان قوشانوۆ.

زاڭ ويىن مەكەمەلەرى مەن، بۋكمەكەر كەڭسەلەرىنە، توتاليزاتورلارعا ءبىرىڭعاي تيپتىك ەرەجە ەنگىزۋدى كوزدەيدى. ءماجىلىس ءتوراعاسىنىڭ پايىمداۋىنشا، بۇل اتالعان مەكەمەلەردىڭ جۇمىسىن تۇسىنىكتى ءارى اشىق ەتەدى.

«تاعى ءبىر ماڭىزدى قادام - قازاقستان اۋماعىندا ونلاين كازينولارعا تىيىم سالىندى. بۇل تالاپتى بۇزعان ادام ەكى جىلعا دەيىن باس بوستاندىعىنان ايىرىلۋى مۇمكىن. تۋريزم جانە سپورت مينيسترلىگىنە بۇكىل ليتسەنزياسى جوق شەتەلدىك بۋكمەكەرلىك كەڭسەلەر مەن توتاليزاتورلاردىڭ ءتىزىمىن جۇرگىزەتىن وكىلەت بەرىلدى. ال بانكتەر مەن تولەم ۇيىمدارىنا ونلاين كازينولاردىڭ پايداسىنا قارجىلىق وپەراتسيالار جۇرگىزۋگە تىيىم سالىندى. ءتۇرلى لوتەرەيا ونىمدەرىنىڭ اشىق قولجەتىمدىلىگى دە شەكتەلەدى. ەندى ول ارنايى ينتەرنەت- رەسۋرس ارقىلى عانا ساتىلادى. كوشەلەردە تەك كلاسسيكالىق لوتەرەيا بيلەتتەرىن ساتاتىن دۇڭگىرشەكتەر عانا قالادى»، - دەيدى ە. قوشانوۆ.

پالاتا باسشىسى لۋدومانياعا قارسى زاڭ بۇكىل قوعامنىڭ سۇرانىسىنان تۋىنداعانىن ايتادى.

«بۇل زاڭنىڭ جان- جاقتى پىسىقتالۋى، وعان بارشا قوعامنىڭ اتسالىسۋى بۇگىن مەملەكەت باسشىسى قول قويعان قۇجاتتىڭ قوعامىمىزدى ايتارلىقتاي ساۋىقتىراتىنىنا سەنىم بەرەدى. دەپۋتاتتار بۇل ماسەلەنى ءالى دە باقىلاۋدا ۇستايدى»، - دەپ جازدى ءماجىلىس ءتوراعاسى.

اۆتور

ەسىمجان ناقتىباي