ءماجىلىس ءتوراعاسى: جولداۋ پرەزيدەنتتىڭ ستراتەگيالىق رەفورمالارىنىڭ جالعاسى

  استانا. KAZINFORM - ماجىلىستە ەرلان قوشانوۆتىڭ توراعالىعىمەن بيۋرو وتىرىسى ءوتتى.

پالاتا سپيكەرى مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىن جۇزەگە اسىرۋدىڭ نەگىزگى مىندەتتەرىن اتاپ ءوتتى.

- ءار جولداۋ-العا دەگەن قارقىندى ۇمتىلىس. پرەزيدەنت لاۋازىمىنا كىرىسكەن كۇننەن باستاپ قاسىم-جومارت كەمەل ۇلى اۋقىمدى ستراتەگيالىق رەفورمالاردى قولعا الدى. بۇگىنگى جولداۋ -سول رەفورمالاردىڭ زاڭدى جالعاسى. وسىلايشا، مەملەكەت باسشىسىنىڭ ەكونوميكا، ساياسات پەن يدەولوگيا سالاسىن قاتار رەفورمالاۋعا باعىتتالعان ستراتەگيالىق باعدارى ۇزدىكسىز ىسكە اسۋدا. بۇگىنگى جولداۋ قوعامدى تولعاندىرىپ وتىرعان ەڭ وزەكتى پروبلەمالارعا ناقتى جاۋاپ دەر ەدىم،- دەدى ءماجىلىس ءتوراعاسى.

ەرلان قوشانوۆ وڭىرلەردى ارالاپ كەلگەن دەپۋتاتتار ازاماتتاردىڭ مۇڭ-مۇقتاجى مەن تالاپ-تىلەگىن، ەلدەگى جاعدايدى جاقسى بىلەتىنىن ايتتى. ول جولداۋدا شاعىن جانە ورتا بيزنەستى قولداۋ، اۋىل شارۋاشىلىعىن قارجىلاندىرۋ، بانكتەردىڭ ەكونوميكاعا كوبىرەك قارجى قۇيۋىنا جاعداي جاساۋ، سالىق ساياساتىن قايتا قاراۋ جانە بيۋدجەت تاپشىلىعى ماسەلەسىن شەشۋ جونىندەگى ماڭىزدى شارالاردىڭ بارلىعى زاڭنامالىق دەڭگەيدە شەشىمىن تابۋى كەرەك ەكەنىن اتاپ ءوتتى.

- قازىر ءماجىلىستىڭ قاراۋىندا بيۋدجەت كودەكسى جاتىر. پالاتاعا جاڭا سالىق كودەكسىنىڭ جوباسى كەلىپ ءتۇستى. وسى كودەكستەردى قاراۋ كەزىندە پرەزيدەنت تاپسىرمالارىنىڭ بارلىعىن ەسكەرۋىمىز كەرەك. بۇل زاڭدار مەملەكەت باسشىسىنىڭ ەكونوميكانى جاڭعىرتۋ بويىنشا تاپسىرمالارىن ورىنداۋدا نەگىزگى ءرول اتقارادى، - دەدى ءماجىلىس ءتوراعاسى.

ءماجىلىس سپيكەرى سونداي-اق پرەزيدەنت «بانكتەر تۋرالى» جاڭا زاڭ قابىلداۋ جونىندە ناقتى تاپسىرما بەرىپ، مەملەكەتتىك كاسىپورىنداردى باسقارۋ ساياساتىن جەتىلدىرۋ جانە اكتيۆتەردى قايتارۋ بويىنشا ناقتى مىندەتتەر جۇكتەگەنىن ەسكە سالدى.

دەپۋتاتتار الدىنا قويىلعان مىندەتتەردىڭ قاتارىندا ۇلتتىق قوردان بولىنگەن قارجىنى ءتيىمدى پايدالانۋ، حالىقتى تولعاندىرىپ وتىرعان ماڭىزدى الەۋمەتتىك ماسەلەلەردى شەشۋ، ونىڭ ىشىندە ءبىلىم بەرۋ سالاسىن جانە بۇقارالىق سپورتتى دامىتۋ ماسەلەلەرى دە بار.

سونداي-اق سپيكەر 6-قازاندا وتەتىن اتوم ەلەكتر ستانتسياسىن سالۋ بويىنشا جالپىحالىقتىق رەفەرەندۋمدا كۇللى قازاقستان حالقىنىڭ ۇستانىمى بەلگىلى بولاتىنىن ايتتى. بۇل - ەلىمىزدە جاڭا ساياسي مادەنيەت قالىپتاسىپ كەلە جاتقانىنىڭ جارقىن كورىنىسى، «حالىق ۇنىنە قۇلاق اساتىن ۇكىمەت» تۇجىرىمداماسىنىڭ ناقتى ناتيجەسى.

ءسوز سوڭىندا ەرلان قوشانوۆ قازىرگى جاھاندىق اۋىرتپالىقتار كەزەڭىندە قازاقستان دامۋدىڭ جاڭا باعدارىن ۇستانىپ، ادىلەتتى، ادال جانە قاۋىپسىز قوعام قۇرۋ جولىندا سەنىمدى تۇردە العا باسىپ كەلە جاتقانىن اتاپ ءوتتى. ال زاڭ شىعارۋشى بيلىك تارماعىنىڭ باستى مىندەتى - ەلدەگى زاڭ مەن ءتارتىپتىڭ ۇستەمدىگىن قامتاماسىز ەتۋ.