ءماجىلىس 1-شىلدەگە دەيىن جۇمىس ىستەيدى: ساراپشى شولۋى
استانا. KAZINFORM - ءماجىلىستىڭ قازىرگى قۇرامى بيىلعى 1-شىلدەگە دەيىن جۇمىسىن جالعاستىرادى. بۇدان كەيىن پارلامەنت تاراتىلىپ، مەملەكەت باسشىسى جاڭا سايلاۋ تاعايىنداۋ تۋرالى جارلىققا قول قويادى. بۇل تۋرالى «Jibek Joly» تەلەارناسىنداعى «تالداۋ» ساياسي جوباسىندا ساياساتتانۋشى عازيز ابىشەۆ مالىمدەدى.
ساراپشىنىڭ ايتۋىنشا، 2023 -جىلدىڭ ناۋرىزىندا سايلانعان دەپۋتاتتار وسى ۋاقىت ارالىعىندا اۋقىمدى زاڭ جوبالارىن قاراپ ۇلگەرگەن. ماسەلەن مەملەكەتتىك ورگاندارعا 1,5 مىڭنان استام دەپۋتاتتىق ساۋال جولدانىپ، وعان 1,7 مىڭنان استام جاۋاپ الىنعان.
- دەپۋتاتتاردىڭ ساۋالدارى ەل ەكونوميكاسى مەن سىرتقى ساياساتتان باستاپ، قۇقىقتىق ءتارتىپ پەن باسقا دا ماڭىزدى سالالاردى قامتىدى. سونىمەن قاتار پارلامەنت قوعامدا ۇلكەن تالقىلاۋ تۋدىرعان ءبىرقاتار زاڭدى ازىرلەپ، قابىلدادى، - دەدى باعدارلاما جۇرگىزۋشىسى.
ەڭ ماڭىزدى قۇجاتتاردىڭ ءبىرى - زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى زاڭ. پرەزيدەنت بۇل قۇجاتقا 2023 -جىلعى 12-شىلدەدە قول قويدى. بۇل زاڭ «ادىلەتتى قازاقستان» تۇجىرىمداماسىن ىسكە اسىرۋدىڭ نەگىزگى قۇرالىنا اينالدى.
2026 -جىلدىڭ ناۋرىز ايىنداعى دەرەك بويىنشا، مەملەكەتكە 1 تريلليون تەڭگەدەن استام قاراجات قايتارىلدى. ونىڭ ىشىندە قولما-قول اقشامەن قاتار جىلجىمايتىن مۇلىك پەن جەر تەلىمدەرى دە بار.
- اكتيۆتەردى قايتارۋ تۋرالى زاڭ وتكەن ونجىلدىقتارداعى كۇماندى ىستەردى رەتكە كەلتىرۋگە مۇمكىندىك بەردى. شىندىعىنا كەلگەندە، بۇنىڭ بارلىعى زاڭسىز جولمەن تابىلعان مۇلىككە قاتىستى ادىلدىكتى ورناتۋ دەگەن ءسوز، - دەپ اتاپ ءوتتى ساراپشى.
الەۋمەتتىك ماڭىزى بار باستامالاردىڭ قاتارىندا 2024 -جىلى قابىلدانعان تۇرمىستىق زورلىق- زومبىلىق ءۇشىن جاۋاپكەرشىلىكتى كۇشەيتۋ تۋرالى زاڭ بار. قۇجات ۇرىپ- سوعۋ مەن دەنساۋلىققا جەڭىل زيان كەلتىرۋدى قايتادان قىلمىستىق سالاعا جاتقىزىپ، زارداپ شەككەندەردى قورعاۋ كۇشەيتىلدى.
سونىمەن قاتار ادامدى نەكەگە تۇرۋعا ماجبۇرلەۋگە قارسى زاڭ قابىلداندى. ەندى قىز الىپ قاشۋ نەمەسە بوپسالاۋ ارقىلى نەكەگە يتەرمەلەۋ ءۇشىن قىلمىستىق جازا قاراستىرىلعان.
- بۇل ەكى زاڭ بۇرىن نازاردان تىس قالىپ كەلگەن جاعىمسىز الەۋمەتتىك قۇبىلىستارعا توسقاۋىل قويدى. مەملەكەت ازاماتتاردىڭ قۇقىعىن قورعاۋ ماسەلەسىندە ءوز ۇستانىمىن ءبىلدىردى، - دەلىنگەن باعدارلامادا.
2024 -جىلى قۇمار ويىندارعا تاۋەلدىلىكپەن كۇرەس تۋرالى زاڭ قابىلدانىپ، ويىنعا قاتىسۋ جاسى 21-گە دەيىن كوتەرىلدى.
ال 2025 -جىلى قابىلدانعان جاڭا سالىق كودەكسى بيىلعى 1-قاڭتاردان باستاپ كۇشىنە ەندى. بۇل قۇجات مۇناي تابىسى ازايعان تۇستا ەل ەكونوميكاسىن تۇراقتاندىرۋ ءۇشىن قاجەت بولعان.
ساراپشىلاردىڭ پايىمداۋىنشا، قازىرگى ءماجىلىستىڭ جۇمىسى ەلىمىزدىڭ زاڭناماسىن جۇيەلى تۇردە جاڭارتىپ، الەۋمەتتىك- ەكونوميكالىق ساياساتتىڭ جاڭا باعىتتارىن قالىپتاستىرۋعا نەگىز بولدى.
