ءجۇز ەسەك باققان شىمكەنت تۇرعىنى ونى سويىپ، ەتىن قىتايعا وتكىزبەك بولعان
شىمكەنت. KAZINFORM - شىمكەنتتە ەسەك باعىپ، ونى بەلگىلەنبەگەن ورىندا سويعان كاسىپكەرگە ايىپپۇل سالىندى. قالا تۇرعىنى ەسەك ەتىن قىتايعا ەكسپورتتاماق بولعان.
الەۋمەتتىك جەلىدە ەسەكتەردى بەلگىلەنبەگەن ورىندا سويىپ جاتىر دەگەن ۆيدەو تارادى. اۆتوردىڭ ايتۋىنشا، بەينەجازبا شىمكەنتتەگى قۇرساي شاعىناۋدانىندا تۇسىرىلگەن.
«بۇنىڭ ءبارى نەگە ءجۇر؟ مىنە، ولارعا جۋىندى بەرەدى. تويحانادان با، ءبىر جاقتان الىپ كەلەدى-اۋ شاماسى. ونى سويعان، دالەل رەتىندە مىنا شۇڭقىردا ەسەكتىڭ سيراقتارى، ىشەك-قارنى جاتىر. اۋرۋ قايدان تارايدى؟ ارينە، وسى جەردەن... ۆەتەريناريالىق ينسپەكسيا ماماندارىن، پوليتسيانى شاقىردىق»، - دەيدى ۆيدەو اۆتورى.
اتالعان بەينەجازبانى ۆەتەريناريالىق باقىلاۋ جانە قاداعالاۋ كوميتەتىنىڭ قالالىق ينسپەكتسياسىنداعىلار دەرەۋ نازارعا العان. وقيعا 12-مامىردا بولعان.
كاسىپ يەسىنىڭ ماماندارعا بەرگەن جاۋابىنا سايكەس، ول بۇل جەردە 104 باس ەسەك پەن 36 ۇساق مال ۇستاعان.
«جۇرگىزىلگەن تەكسەرۋ جۇمىسىنا سايكەس كاسىپكەر 4 ەسەكتى بەلگىلەنبەگەن ورىندا سويعانى انىقتالدى. ال ونىڭ ەتىن توڭازىتقىشتا ساقتاعان. بىزگە بەرگەن جاۋابىندا ول مال ەتىن جيناپ، قىتاي ەلىنە ەكسپورتتاماق بولعانىن ايتتى. سويىلعان ەتتىڭ بارلىعىن ءبىز الدىق، ونى جويۋ جۇمىستارى ءجۇرىپ جاتىر. ءبىزدىڭ زاڭنامادا ەسەك اسىراۋعا تىيىم سالىنباعان. ءبىراق ونى ارنايى بەكىتىلگەن ورىندا سويۋ كەرەك. بۇل تالاپتى ورىنداماعانى ءۇشىن (اكىمشىلىك قۇقىق بۇزۋ تۋرالى كودەكستىڭ 406-بابى) كاسىپ يەسىنە ايىپپۇل سالىندى»، - دەدى شىمكەنت قالالىق ۆەتەريناريالىق باقىلاۋ ينسپەكسياسىنىڭ ءبولىم باسشىسى سىرىم قارابەكوۆ.
ال قالا تۇرعىنىنا اكىمشىلىك قۇقىق بۇزۋ تۋرالى كودەكستىڭ 505-بابىمەن حاتتاما تولتىرىلعان.
اۆتور
جانسايا تاۋەكەل قىزى
