ءجۇز رەت وتاعا ءتۇستىم: قىتايلىق ايەل سۇلۋ بولۋ ءۇشىن 10 جىل بويى وپەراتسيا جاساتقان
پلاستيكالىق حيرۋرگيا قىتايدا بۇرىنعىداي تىيىم سالىنعان تاقىرىپ ەمەس. كەيىنگى جيىرما جىلدا بۇل سالاعا دەگەن سۇرانىس تىپتەن ەسەلەنگەن: جىل سايىن 20 ميلليون قىتايلىق بەت-الپەتىن وزگەرتۋ تۋرالى شەشىم قابىلدايدى. ولاردىڭ 80 پايىزى - ايەلدەر، ورتاشا جاسى - 25.
بۇل ستاتيستيكانىڭ ارتىندا ناقتى تاعدىرلار مەن ەموتسيالىق اۋىرتپالىقتار بار. سونىڭ ءبىرى - بەيجىڭدە تۇراتىن ەببي ۋ ەسىمدى ايەل. ول العاشقى پلاستيكالىق وپەراتسياسىن 14 جاسىندا جاساتقان. سول كەزدەن باستاپ بۇگىنگە دەيىن 100-دەن استام ءتۇرلى پروتسەدۋرادان وتكەن.
ەببيدىڭ ءومىرى گورمونالدى ەمنەن كەيىن كۇرت وزگەرگەن: سالماعى ەكى ايدا 42 كەلىدەن 62 كەلىگە دەيىن وسكەن. دراما ۇيىرمەسىندەگى مۇعالىمى: «سەن جۇلدىز ەدىڭ، ەندى تىم تولىقسىڭ. سالماق تاستا، نەمەسە ساحنانى ۇمىت»، - دەپ كەسىپ ايتقان. قىزدىڭ اناسى ونى ليپوساكسياعا اپارعان. شەشەسى ايتقان ءبىر اۋىز ءسوز ەببيدىڭ ەسىندە ماڭگى قالعان:
«قورىقپا. كىر دە شىق. ادەمى بولاسىڭ».
جارتىلاي انەستەزيامەن جاسالعان وپەراتسيادا ەببي ەسىن جوعالتپاعان - ول دەنەسىنەن الىنعان مايدى دا، اققان قاندى دا كورىپ تۇرعان. قازىر ول 35 جاستا جانە ءوزى يەلىك ەتەتىن ەستەتيكالىق كلينيكانىڭ ارقاسىندا قىتايداعى بەت-الپەتتى وزگەرتۋشىلەردىڭ سيمۆولىنا اينالعان.
الايدا ەببيدىڭ سۇلۋلىق جولىنداعى كۇرەسى تەك سىرت كەلبەتپەن عانا شەكتەلمەيدى. جاق سۇيەگىن كىشىرەيتۋ ءۇشىن ءۇش رەت وپەراتسيا جاساتقان ول اي سايىن بەتكە ءپىشىن بەرەتىن ينەكسياعا جۇگىنەدى. اينا الدىندا كوگەرگەن جەرلەرىن كونسيلەرمەن جاپقان ول بۇل پروتسەدۋرالاردان ەش وكىنبەيتىنىن ايتادى:
قازىر قىتايداعى سۇلۋلىق ستاندارتتارى بۇرىنعىداي ەمەس. ءقازىر جاستار انيمە كەيىپكەرلەرى مەن K-Pop جۇلدىزدارىنا ۇقساۋعا تىرىسادى. كىرتيگەن قاباق، ءسۇيىر يەك، كوزدىڭ ۇلكەندىگى مەن بەت ءپىشىنىنىڭ بالاعا ۇقساۋى - باستى تالاپقا اينالعان.
