ءجۇز جاستان اسقاندا ۇيلەنگەن ەرلى-زايىپتى گيننەستىڭ رەكوردتار كىتابىنا ەنۋى مۇمكىن
استانا. قازاقپارات - 100 جاسىندا وتاۋ قۇرعان امەريكالىق جۇپ گيننەستىڭ رەكوردتار كىتابىنا ەنۋى مۇمكىن. بۇل تۋرالى Anadolu اگەنتتىگى جازدى.
فيلادەلفيالىق 100 جاستاعى بەرني ليتتمان مەن 102 جاستاعى ماردجوري فيتەرمان ەڭ قارت جۇپ رەتىندە گيننەستىڭ رەكوردتار كىتابىنا كىرۋگە ءوتىنىش بەردى. ولاردىڭ ۇيلەنۋ تويى قارتتار ۇيىندە ءوتتى.
ليتتماننىڭ نەمەرەسى سارا زيچەرمان ونىڭ اتاسى ماماندىعى بويىنشا مۋزىكانت بولعانىن ايتادى. ونىڭ بۇرىنعى نەكەسى 65 جىلعا سوزىلعان. ايەلى قايتىس بولعاننان كەيىن اتاسى قارتتار ۇيىنە ورنالاستىرىلعان، ول سوندا فيتەرماندى كەزدەستىرگەن. فيتەرمان دا 60 جىل بىرگە وتاسقان وتاعاسىنان ايىرىلعان.
ءبىر قىزىعى، بەرني ليتتمان مەن ماردجوري فيتەرمان ءبىر ۋنيۆەرسيتەتتە وقىعان، ءبىراق ول كەزدە ءبىر-ءبىرىن تانىماعان.
ەرلى-زايىپتىلاردىڭ ماحابباتى توعىز جىل بۇرىن باستالعان دەسەدى.
«اتام ۇيلەنگىسى كەلەتىنىن ايتقاندا، ءبىز قاتتى تاڭ قالدىق. ولار رەسمي تۇردە ۇيلەنەدى دەپ ويلاعان جوقپىز. ءبىراق اتام تابان تىرەپ تۇرىپ الدى، ولار ۇيلەندى»، - دەپ قوستى سارا.
اۆتور
جاراسقان نۇرىبايەۆ
