ءجۇز جاستاعى قارت اجە سوعىس كەزىندە نە ىستەگەنىن ايتتى

اتىراۋ. KAZINFORM - اتىراۋ وبلىسىندا ەكىنشى جۇنيەجۇزىلىك سوعىس كەزىندە تەمىرجولدى قالپىنا كەلتىرۋگە قاتىسقان ۇلجان تەمىربولاتوۆا تۇرادى. جاقىندا ول 100 جاسقا تولدى. ول 1925 -جىلى يندەر اۋدانىنداعى جارسۋات اۋىلىندا ومىرگە كەلگەن. قۇجاتىنداعى تۋعان كۇنى - 25-اقپان.

- بالا كەزىمىز اشارشىلىقپەن تۇسپا-تۇس كەلدى. ەل ىشىندە ىشەرگە تاماق تابىلماعان كەزدە ۇلكەندەر جايىق وزەنىنەن بالىق اۋلادى. ودان كەيىن قۋعىن-سۇرگىندى دە كوردىك. ەندى ەس جيامىز-اۋ دەپ جۇرگەندە، سوعىس ءورتى لاپ ەتە ءتۇستى. وسى كەزدە ەر-ازاماتتىڭ ءبارى مايدانعا اتتانىپ، ايەلدەر مەن جاسوسپىرىمدەر اۋىر ەڭبەككە ارالاستى. اسىرەسە انالارىمىز كۇنى-ءتۇنى جۇمىس ىستەپ، بار قيىندىقتى تايسالماي كوتەردى، - دەپ ەسكە الدى ۇلجان تەمىربولاتوۆا.

جاستايىنان اۋىر ەڭبەكپەن شىڭدالعان ول تەمىرجول سالۋ ىسىنە قاتىسقان. فاشيستەر رەسەي فەدەراتسياسىنىڭ استراحان وبلىسىنداعى تەمىرجولدى بۇزىپ كەتكەن. سول كەزدە ۇلجان تەمىربولاتوۆا 10 عا جۋىق قۇربىسىمەن بىرگە سول وڭىردەگى تەمىرجولدى قالپىنا كەلتىرۋگە جىبەرىلگەن.

- جۇمىستىڭ جەڭىلى بولمايدى عوي. تەمىرجول سالۋ وتە قيىن ەكەن. اسىرەسە بۇعانامىز ءالى قاتا قويماعان جاس ءوسپىرىم شاقتاعى توپىراق تاسىعانىمىز، اۋىر رەلستەردى قولمەن توسەگەنىمىز ءالى ەسىمنەن كەتپەيدى. بالعانىڭ سالماعى اۋىر ەدى. توبەمىزدەن جاۋ ۇشاعى ۇشقاندا، تىعىلاتىن قالقا تابا الماي، جان-جاققا قاشامىز. جاۋ ۇشاعىنىڭ داۋىسى ماسانىڭ ىزىڭى سەكىلدى ەستىلەدى. ءوزىمىز الدىنا الا قازىپ قويعان شۇڭقىرعا تىعىلۋعا ءماجبۇر بولامىز. ىشەتىن تاماق تا، كيەتىن كيىم دە تاپشى. بۇگىنگى ۇرپاعىمىز سونداي قيىندىقتى كورمەگەنىن قالايمىن، - دەيدى ۇلجان تەمىربولاتوۆا.

كەيىن سۇراپىل سوعىستان ورالعان مايدانگەر ءماتجان عۇبايدۋللينمەن وتاۋ قۇرعان. ولار 2 ۇل، 3 قىز دۇنيەگە اكەلىپ، ءتالىمدى تاربيە بەردى.

ال 1957 -جىلى وتباسىمەن قىزىلقوعا اۋدانىنىڭ ورتالىعى - ميالى اۋىلىنا قونىس اۋدارعان. كۇيەۋى بۇرىنعى «سەلحوزتەحنيكا» مەكەمەسىندە جۇمىس ىستەگەن. ال ءوزى «پ م ك-907» مەكەمەسىنىڭ سىلاقشىسى بولعان.

عاسىرلىق بەلەستى باعىندىرعان ۇلجان تەمىربولاتوۆا 5 پەرزەنتىنەن 40-تان استام نەمەرە-جيەن مەن شوبەرە كورىپ وتىر. بىلتىر وعان «قىزىلقوعا اۋدانىنىڭ قۇرمەتتى ازاماتى» اتاعى بەرىلگەن.

كەلىنى جازيرا ەسەنعازىنىڭ ايتۋىنشا، 100 جاستاعى كەيۋانا دالاعا ەشكىمنىڭ كومەگىنسىز شىعادى. مالدىڭ جايىن سۇراپ وتىرادى.

- اجەمىزدىڭ دەنساۋلىعىنا شاعىم ايتپايدى. نەمەرە-شوبەلەرىن ماڭدايىنان ءسۇيىپ، ءجيى ەركەلەتەدى. كۇن سايىن باتاسىن بەرىپ، اۋلەتىمىزدىڭ بەرەكەسىن ارتتىرىپ وتىر، - دەيدى جازيرا ەسەنعازى.

قازىر عاسىر جاساعان انانىڭ بالالارىنىڭ ۇلكەنى 75 جاسقا تولعان. ودان كەيىنگىسى 60 جاستان اسقان.

- ادامنىڭ قانشا عۇمىر سۇرەتىنى ءبىر اللاعا عانا ايان عوي. جۇمىس اۋىر بولسا دا ەرىنبەدىك، ادال ەڭبەك ەتتىك. بالالارىمىز امان ءوسىپ، ءۇبىرلى-ءشۇبىرلى بولسا ەكەن دەپ تىلەدىم. 100 جاسقا تولامىن دەگەن ويىم بولعان جوق. بۇل - جاس كۇنىمدەگى كورگەن بەينەتىمنىڭ زەينەتى شىعار، - دەيدى ۇلجان تەمىربولاتوۆا.

نەمەرەسى تالعات عۇبايدۋلليننىڭ پىكىرىنشە، اجەسى باتا جاتتاتىپ، ۇلكەندەردىڭ اڭگىمەسىن تىڭداتادى.

- اجەمىزدى قوناققا دا، تويعا دا شاقىرۋشىلار كوپ. سونداي قوناقتىققا دا، تويعا دا نەمەرەلەرىن ەرتىپ بارادى. ۇلكەندەردىڭ اڭگىمەسىن تىڭدايمىز. ولار بىزگە باتا بەرەدى. اجەمىز باتا جاتتاتىپ، ونەگەلى اڭگىمەسىن ايتادى، - دەيدى تالعات عۇبايدۋللين.

اۆتور

جولداسبەك شوپەعۇل