ءجۇرىپ بارا جاتقان كولىك تەرەزەسىنەن دەنەسىن شىعارعان جولاۋشى ۇستالدى
استانا. قازاقپارات - اقمولا وبلىسىنىڭ پوليتسياسى ءجۇرىپ بارا جاتقان كولىك تەرەزەسىنەن دەنەسىن شىعارعان جولاۋشىنى انىقتادى. جۇرگىزۋشى جاۋاپقا تارتىلدى، - دەپ حابارلايدى Polisia.kz-كە سىلتەمە جاساپ.
بۇزۋشىلىق تۋرالى بەينە جازبا Instagram الەۋمەتتىك جەلىسىنىڭ پاراقشاسىندا جاريالاندى جانە اقمولا پوليتسەيلەرىنىڭ نازارىن اۋداردى. كادرلاردا جولاۋشىنىڭ كولىك قوزعالىسى كەزىندە تەرەزەدەن دەنەسىن شىعارىپ تۇرعانى كورىنەدى. ول ءوز ومىرىنە قاۋىپ ءتوندىردى جانە ماڭايىنداعىلارعا توتەنشە جاعداي تۋدىرۋى مۇمكىن ەدى.
تەكسەرۋ بارىسىندا پوليتسەيلەر اۆتوكولىكتىڭ ءنومىرى بويىنشا يەسىن تاپتى. وقيعا بىرنەشە كۇن بۇرىن بۋراباي كۋرورتتىق ايماعىنىڭ اۋماعىندا بولعانى انىقتادى. كولىك جۇرگىزۋشىسى تۇركىستان وبلىسىنىڭ 29 جاستاعى تۇرعىنى بولىپ شىقتى. وعان قاتىستى پوليتسيا قىزمەتكەرلەرى ق ر ا ق ب ت ك-نىڭ 593-بابى 1-بولىگى (جول ءجۇرىسى قاعيدالارىندا كوزدەلگەن جولاۋشىلار مەن جۇكتەردى تاسىمالداۋ، قاۋىپسىزدىك بەلدىكتەرىن نەمەسە موتوشلەمدەردى پايدالانۋ جونىندەگى تالاپتاردى ساقتاماۋ) بويىنشا اكىمشىلىك حاتتاما جاسادى.
پوليتسەيلەر جول قوزعالىسىنىڭ بارلىق قاتىسۋشىلارىنان جول قوزعالىسى ەرەجەلەرىن مۇلتىكسىز ساقتاۋدى جانە ءوزىنىڭ جانە جول قوزعالىسىنىڭ باسقا دا قاتىسۋشىلارىنىڭ ءومىرى مەن دەنساۋلىعىنا قاۋىپ توندىرمەۋىن سۇرايدى.
