ChatGPT ەندى كورەدى، ەستيدى جانە سويلەي الادى
OpenAI كومپانياسىنىڭ ChatGPT چات- بوتى ەندى «كورەدى، ەستيدى جانە سويلەي الادى» نەمەسە ايتىلعان سوزدەردى ءتۇسىنىپ، سينتەتيكالىق داۋىسپەن جاۋاپ بەرىپ، سۋرەتتەردى وڭدەي الادى. قازاقپارات بۇل تۋرالى CNBC باسىلىمىنا سىلتەمە جاساپ حابارلايدى.

كومپانيا مالىمەتىنە سايكەس، چات- بوتتىڭ بۇل جولعى جاڭارۋى GPT-4 پايدا بولعاننان بەرگى - ەڭ ءىرىسى. ول قولدانۋشىلارعا ChatGPT موبيلدىك باعدارلاماسىنداعى دىبىستىق اڭگىمەلەرگە ارالاسۋعا، بوت جاۋاپ بەرەتىن بەس سينتەتيكالىق داۋىستىڭ ءبىرىن تاڭداۋعا مۇمكىندىك بەرەدى. سونىمەن قاتار پايدالانۋشىلار ChatGPT كومەگىمەن سۋرەت الماسا الادى.
جاڭا باعدارلاما اقىلى قولدانۋشىلار ءۇشىن الداعى ەكى اپتا ىشىندە قولجەتىمدى بولادى. دىبىستىق فۋنكتسياعا iOS جانە Android قوسىمشالارىندا شەكتەۋ بار، دەگەنمەن سۋرەتتەردى بارلىق پلاتفورمادا وڭدەۋگە مۇمكىندىك جاسالعان.
تەحنولوگيا الىپتارى، اسىرەسە وسى جازدا، چات- بوتتارعا جاڭا قوسىمشا عانا ەمەس، جاڭا قىزمەت قوسۋعا دا تىرىسىپ جاتىر. Google ءوزىنىڭ Bard چات- بوتىنىڭ كوپتەگەن جاڭالىقتارى بار ەكەنىن ءمالىم ەتتى، ال Microsoft كومپانياسى Bing جۇيەسىنە ۆيزۋال ىزدەۋدى قوستى.
ءوز كەزەگىندە ساراپشىلار جاساندى ينتەللەكت تۇرلەندىرەتىن سينتەتيكالىق داۋىستارعا الاڭداۋشىلىق ءبىلدىردى. سەبەبى ولار سەنىمدى ديپفەيك تۋدىرۋى مۇمكىن. كيبەرقاۋىپسىزدىك جۇيەسىنە ەنۋ ءۇشىن ديپفەيكتى قالاي پايدالانۋعا بولاتىنىنا زەرتتەۋ باستالىپ تا كەتكەن.