ChatGPT كومەكشىمە اينالدى - ىقىلاس ورازباي ۇلى
الەمنىڭ نازارىن اۋدارعان OpenAI كومپانياسىنىڭ ChatGPT چات-بوتى بۇل كۇندە ۇلكەن جەتىستىكتەردى باعىندىرىپ ۇلگەردى. اسىرەسە GPT-4 جاڭالىعى «كورەدى، ەستيدى جانە سويلەي الادى» نەمەسە ايتىلعان سوزدەردى ءتۇسىنىپ، سينتەتيكالىق داۋىسپەن جاۋاپ بەرىپ، سۋرەتتەردى وڭدەي الادى.
ءبىز ChatGPT چات-بوتىنىڭ مۇمكىندىكتەرىن قانشالىقتى پايدالانىپ ءجۇرمىز؟ ونىڭ بىزگە ناقتى قانداي پايداسى بار جانە قوعامعا قانداي كەرى اسەرى بولۋى مۇمكىن؟ وسى سۇراقتار توڭىرەگىندە مالايزيا ەلىندە تۇرىپ جاتقان قانداسىمىز، IT سالاسىنىڭ مامانى ىقىلاس ورازباي ۇلىنان Kazinform ءتىلشىسى سۇراپ ءبىلدى.
- اڭگىمەڭىزدىڭ ءالقيسساسىن ChatGPT تۋرالى قىسقاشا انىقتامادان باستاساڭىز...
- ChatGPT - بۇل سوڭعى ۇلگىدەگى كەمەلدى جاساندى سانا دەپ ايتۋعا بولادى. ونىمەن سويلەسۋگە، سۇحباتتاسۋعا، كەز كەلگەن سۇراق توڭىرەگىندە كومەك سۇراۋعا بولادى. ول كوپتەگەن تاپسىرمانى ورىنداي الادى. بەرگەن تاپسىرماڭىزعا وراي ماقالا، ەسسە، اڭگىمە جازادى. جاۋاپتارىن وزگەرتە الادى - ەگەر بوت قاتە جاۋاپ بەرسە، ءسىز وعان بۇل تۋرالى ايتا الاسىز. كەز كەلگەن سالادا تولىمدى جاۋاپ بەرۋگە تىرسادى. سۋرەت سالادى، ناۋقاسقا دياگنوز قويۋ جانە باسقا تولىپ جاتقان مۇمكىندىكتەرى بار.
- ءسىز ناقتى قانداي مۇمكىندىكتەرىن پايدالانىپ ءجۇرسىز؟
- ChatGPT العاشقى نۇسقاسى جاريالانعاننان باستاپ وعان نازارىم اۋدى. 4-5 ايدان بەرى قولدانىپ كەلەمىن. اسىرەسە GPT-4 نۇسقاسى جاريالانعاننان كەيىن ءتىپتى كوپ پايدالاناتىن بولدىم. اۆتوماتتى اۋدارۋ جۇيەسىنىڭ ءوزى Google اۋدارماشىدان جاقسى اۋدارادى. مەن سۋرەت سىزۋ، ماقالا جازدىرۋ، كىتاپتاردى، ماقالالاردى مازمۇنداۋ سەكىلدى مۇمكىندىكتەرىن كوپ پايدالانامىن. 1 مينۋتقا جەتپەيتىن ۋاقىتتا ادامنىڭ كوڭىلى تولاتىن كوركەم فوتونى دايىنداپ بەرەدى. مەن وعان قازاقي فوتولار دا سىزدىرىپ كوردىم.
- ChatGPT چات-بوتىنىڭ قانداي كەمشىلىگىن بايقادىڭىز؟
- قازاقشا ايتقان ءسوزدى ءتۇسىنۋى مەن جاۋاپ بەرۋىندە قيىندىقتار كەزدەسەدى. بۇل جاعىن الداعى ۋاقىتتا جاقسارتادى دەپ ويلايمىن. ويتكەنى ChatGPT ايفون سەكىلدى جاڭالانىپ وتىرادى، كەمەلدەنىپ وتىرادى. كەلەشەكتە ول ەكران ارقىلى تىكەلەي جۇزدەسىپ، سىزبەن سۇحباتتاساتىن دەڭگەيگە جەتۋى مۇمكىن. ءسىزدىڭ كوڭىل- كۇيىڭىزدى دە ەموتسياڭىز ارقىلى سەزىپ، ءبىلىپ وتىراتىن بولادى.
- جالپى جاساندى سانانىڭ قوعامعا قانداي كەرى ىقپالى بولۋى مۇمكىن؟
- جاساندى سانا قوعامنىڭ ءار سالاسىنا تولىق مۇمكىندىگى مەن ىقپال ەتكەندە، ۇلكەن وزگەرىستەر بولۋى مۇمكىن. كوپتەگەن مامان جۇمىسسىز قالۋى مۇمكىن. كەز كەلگەن سالا، دارىگەر، وقىتۋشى، ءتىپتى مۋزىكانتتار دا نازاردان تىس قالمايدى. ChatGPT- دىڭ كونتەنت جازۋ، ارحيتەكتۋرا، ديزايىن، ءتىپتى كومپانيانىڭ باس ديرەكتورىن ورنىن اۋىستىرۋعا دەيىن مۇمكىندىگى بار. بولاشاقتا نەيروندىق جەلىلەر ادامنىڭ زياتكەرلىك جۇمىسىنىڭ كوپ بولىگىن جاساي الادى دەگەن الاڭداۋشىلىق بار. ChatGPT بارلىق تىلدە سويلەپ تۇرسا، سەنىڭ وي-دەڭگەيىڭنەن جوعارى ماقالا جازىپ بەرسە، وندا ءتىل ۇيرەنۋدىڭ قانشالىق قاجەتى قالادى، جالپى وقۋ-اعارتۋ سالاسىنا، ءتىپتى ادامنىڭ ءومىر ءسۇرۋ داعدىسىنا ۇلكەن توڭكەرىس اكەلۋى مۇمكىن. سوندىقتان دا كەيبىر مەملەكەتتەر بۇل جاساندى ساناعا قارسى تۇرىپ جاتىر.
- ءسىزدىڭ ويىڭىز قالاي؟ قازاق قوعامى جاساندى سانادان باس تارتقانى دۇرىس پا؟
- «قار كەتپەيىن دەگەنمەن كۇن قويمايدى» دەمەكشى، جاساندى سانا ومىرىمىزگە جاقسىلىقتارىمەن قوسا، ءبىر الۋان پروبلەمالارىن دا الا كەلەدى. ءبىراق ەندى ونىڭ دامۋىن ادامزات توسا المايدى. قازاق تۇگىلى كۇللى ادامزات باس تارتا الاتىن دەڭگەيدەن كەتتى. تەك ەندىگىسى، وسى وزىق قۇرالدى پايدالانىپ ءومىر ءسۇرۋدى قالاي جەڭىلدەتەمىز دەگەندى ويلاۋ كەرەك. مەنىڭشە، بۇل كاسىبي ماماندار مەن تەحنولوگتار جەتىسپەيتىن قازاق دالاسى ءۇشىن اسا قاجەتتى تەحنيكا. مىسالى: اۋعانستاندا ءتۇرلى قاقتىعىستار سەبەبىنەن جىلىنا 7-8 مىڭ ادام ولسە، ال بەيبىت قازاقستاندا جول اپاتىنان جىلىنا 15 مىڭ ادام كوز جۇماتىن كورىنەدى. بۇل دەگەنىڭىز سۇمدىق كورسەتكىش. ەگەر بۇكىل كولىك اۆتوپيلوتقا وزگەرسە، جول اپاتىنىڭ بولۋ سالىستىرماسى كۇرت تومەندەسە قانشاما وتباسى اي مەن كۇننىڭ امانىندا مەزگىلسىز قارا جامىلماس پا ەدى دەگەن ىشكى ارمان بار.
قازاقتىڭ بايتاق دالاسىنا تولىق روبوتتانعان زەردەلى شارۋاشىلىق تەحنيكالارى كەرەك. ولار 24 ساعات بويى تىنىمسىز ىستەي الادى. سوندا وسى ۇلان-بايتاق تەريتوريانى تولىق پايدالانۋىمىزعا كۇش-قۋاتىمىز جەتەر مە ەدى؟! ءبىراق بىزدەن بۇرىن باسقالار قيمىلداپ كەتپەسە...
- اڭگىمەڭىزگە راحمەت!
اۆتورريزابەك نۇسىپبەك ۇلى
