ءۇشىنشى دۇنيەجۇزىلىك سوعىستىڭ بولاتىنى 25 جىل بۇرىن بولجانعانى راس پا؟

الەۋمەتتىك جەلىلەردە ءۇشىنشى دۇنيەجۇزىلىك سوعىس الدىن الا ايتىلعان دەگەن اقپارات تارادى. بۇعان دالەل رەتىندە 25 جىلدان اسا ۋاقىت بۇرىن شىققان «يلليۋميناتتار: جاڭا الەمدىك ءتارتىپ» ۇستەل ويىنىنداعى كارتوچكانىڭ سۋرەتى كەلتىرىلگەن، وندا گەوگرافيالىق كارتانىڭ بولىگى - تاياۋ شىعىس ەلدەرى بەينەلەنگەن.

بۇل - جالعان اقپارات، - دەپ حابارلايدى stopfake.kz.

«يلليۋميناتتار: جاڭا الەمدىك ءتارتىپ» ويىنى تارو كارتالارىنىڭ كولوداسىنا ۇقسايدى. ونداعى سۋرەتتەر «يلليۋميناتۋس» تريلوگياسىنان الىنعان، بۇل - 1975-جىلى قاستاندىق تەوريالارىنا، سيقىرلارعا جانە بالاما دىندەرگە قاتىستى ساتيرالىق رومان.

وسى كىتاپ شىققاننان كەيىن، 1981-جىلى Steve Jackson Games رومانعا نەگىزدەلگەن ۇستەل ويىنىن شىعاردى. ال 1994-جىلى ول كارتا ويناۋعا اۋەس جاندارعا «جاڭا الەمدىك ءتارتىپ» دەپ اتالاتىن كولودا جاسادى. وسى كولوداداعى «ەپيدەميا»، «پەنتاگون» جانە «تەرراكت» سياقتى كارتالار بىرنەشە رەت قاستاندىق تەورياسى تۋرالى فەيكتەرگە نەگىز بولىپ، فاكتچەكەرلەرمەن اشكەرەلەنگەن.

كومپانيانىڭ يەسى جانە ويىن اۆتورى ستيۆ دجەكسون DRAGON Magazine جۋرنالىنا بەرگەن سۇحباتىندا جالپى قاستاندىق تەوريالارىنا، اتاپ ايتقاندا يلليۋميناتتارعا ەشقاشان سەنبەگەنىن، ءبىراق «ولاردى وتە قىزىقتى دەپ تاباتىنىن» ايتقان. سونداي-اق، ول جاسالعان كارتالاردى ساۋەگەيلىك دەپ سانامايتىنىن جانە ولاردى جاساعاندا ەشقانداي قۇپيا ماعىنا بولماعانىن مالىمدەدى. كونسپيرولوگيالىق ساتيرالىق رومان شابىت الۋ ءۇشىن عانا پايدالانىلعان، ال ويىن كارتالارىن جاساۋ يدەيالارىن ۇلى بريتانيالىق ەنتسيكلوپەديادان باستاپ اندەگراۋند كوميكستەر جيناعىنا دەيىنگى كوپتەگەن دەرەككوزدەن الىندى.

«مەن وقىعان بارلىق ماتەريالدىڭ ىشىندە باسقالارعا قاراعاندا شىنداپ جازىلسا دا ويعا قونىمسىز تەوريالار ايتىلعان ماقالالار قىزىق بولدى. مۇنداي ويىندى ويناعان قىزىعىراق بولاتىنى انىق»، - دەپ ءتۇسىندىردى ستيۆ دجەكسون.

بۇگىندە كوللەكتسيالىق بولىپ سانالاتىن جانە ينتەرنەت-اۋكتسيونداردا ساتىلاتىن بۇل كولودادا «ءۇشىنشى دۇنيەجۇزىلىك سوعىس» دەپ اتالاتىن كارتا بار. ءبىراق ءىس جۇزىندە وندا جارىلىس بەينەلەگەن.

ال قازىر الەۋمەتتىك جەلىلەردە تارالعان حابارلامادا اۆتور سوعىستىڭ «بولجانعانى» تۋرالى فەيك اقپارات جاساۋ ءۇشىن گرافيكالىق رەداكتورمەن جارىلىستىڭ سۋرەتىن يزرايل، پالەستينا، سيريا، يراك، ساۋد ارابياسى، مىسىر جانە ت. ب. اۋماقتارى كورسەتىلگەن كارتامەن الماستىرعان. بۇل گەوگرافيالىق كارتانىڭ ءتۇپنۇسقاسىن ءارتۇرلى سايتتاردان، سونىڭ ىشىندە مەكتەپ وقۋشىلارىنا ارنالعان ونلاين وقۋلىقتان كورۋگە بولادى.

دەمەك، تارالعان كەسكىن - جالعان اقپارات. بىرىنشىدەن، ۇستەل ويىنىن جاساۋشىلار وعان قۇپيا ماعىنا بەرمەگەن نەمەسە بولجام جاساماعان. ولار ويىن جاساۋ ءۇشىن ءارتۇرلى قاستاندىق تەوريالارى مەن كوميكستەردەگى يدەيالاردى جيناعان. ەكىنشىدەن، بۇل ويىن كولوداسىندا تاياۋ شىعىس ەلدەرى بەينەلەنگەن كارتا جوق.