ءۇشقوڭىرداعى جۇزدەگەن گەكتار جەرگە مەنشىك قۇقىعى زاڭسىز بەرىلگەن - ماقسات تولىقباي
استانا. KAZINFORM - ءماجىلىس دەپۋتاتى ماقسات تولىقباي ءۇشقوڭىر ۇستىرتىنە بارار جولدى مۇزداي قارۋالانعان توپتىڭ كۇزەتۋىنە نارازىلىق ءبىلدىردى.
بۇل رەتتە ول پرەمەر-ءمينيستردىڭ ورىنباسارى سەرىك جۇمانعارين مەن باس پروكۋرور بەرىك اسىلوۆتىڭ اتىنا ساۋال جولدادى.
«ەل امان، جۇرت تىنىشتا «تاۋ-تاستى مەنشىكتەپ الىپتى» دەگەندى ەستىدىڭىزدەر مە؟! ەندەشە ايتايىن. ءۇشقوڭىر دەگەن تاۋدىڭ بارىن ءبارىڭىز بىلەسىزدەر. تالايلاردىڭ كىندىك قانى تامىپ، تىرلىگىنە ارقاۋ بولعان سول تاۋ بۇگىندە ساي-سالا، قىرات-جوتالارىمەن تۇگەل ءبىر ازاماتتىڭ عانا مەنشىگىندە. الماتى وبلىسىنداعى ءۇشقوڭىر ۇستىرتىنە بارار جولدى باسىنان اياعىنا دەيىن مۇزداي قارۋالانعان توپ كۇزەتەدى. جول جوق ەمەس، بار. ءبىراق جابىق. كوزىممەن كورىپ، سول تاۋدىڭ ەتەگىندەگى ەلمەن تىلدەسكەن سوڭ، دەپۋتاتتىق ساۋالعا ارقاۋ بولىپ وتىر. بىرىنشىدەن، ءۇشقوڭىر ىلە الاتاۋ پاركىنە قارايتىندىقتان، ول اۋماقتى ۇلتتىق پاركتىڭ كۇزەتشىلەرى كۇزەتۋ كەرەك ەمەس پە؟ الدە، بۇل تاۋ «دۇنيەاگرو» كومپانياسىنا اتاسىنان مۇرا بولىپ قالعان با؟ قىراتقا كىرەبەرىستەن 8 شاقىرىم قاشىقتا ورنالاسقان رەزيدەنتسيانىڭ اۋماعى عانا قورشالىپ، شلاگباۋم قويىلسا تاعى ءبىر ءسارى... ال، جان بالاسىن جۋىتپاي، تاۋدى اينالدىرا قورشاپ تاستاۋ - بارىپ تۇرعان باسسىزدىق»، - دەدى م. تولىقباي ءماجىلىستىڭ جالپى وتىرىسىندا.
ونىڭ ايتۋىنشا، قاراساي اۋدانىنىڭ تۇرعىندارى ءوز جەرىنە ءوز مالدارىن جايا الماي وتىر. AMANAT پارتياسى جايىلىم تاپشىلىعىن شەشۋ ءۇشىن ارنايى «جەر اماناتى» كوميسسياسىنىڭ تىكەلەي ارالاسۋىمەن رەسپۋبليكا بويىنشا 9 ميلليون گەكتاردان استام جەر قايتارىلىپ، ال ونىڭ وسى ايماقتان 1400 گەكتارى ەل يگىلىنە بەرىلدى.
«سويتسەك، ونىمىز بەكەر ەكەن، «اماناتتىق» اعايىن! جۇرتقا قاجەت جايىلىم جەردىڭ ءبارى جاڭاعى قورشاۋدا قالىپ قويعان. وسىلايشا جۇرتتىڭ ءوز جەرىنە كىرمەك تۇگىلى جاڭاعى قارۋلى بەكەتتەن وتۋگە ءداتى جەتپەي ءجۇر. انىعى، «دۇنيەاگرو» ج ش س- ىنە 2004-جىلى «ءۇشقوڭىر» ۇستىرتىندە ورنالاسقان جۇزدەگەن گەكتار جەرگە مەنشىك قۇقىعى زاڭسىز بەرىلگەن. ويتكەنى، زاڭ تالاپتارى بويىنشا ارنايى ماقساتتاعى جەرلەردى زاڭدى تۇلعالاردىڭ جەكەشەلەپ الۋىنا قۇقىعى جوق. ءتىپتى ونى بولۋگە دە كەلمەيدى. بۇل نورمالاردى جەرگىلىكتى پروكۋراتۋرا جاقسى بىلەدى. ءبىراق، جەردىڭ زاڭسىز بەرىلۋ فاكتىسى بويىنشا پروكۋراتۋرانىڭ تالاپتارىن سوت قاناعاتتاندىرماي تاستاعان. سوراقىسى دا سول بولىپ تۇر. «سوندا قازاقستان رەسپۋبليكاسىنىڭ زاڭىنا شەكەسىنەن قارايتىن بۇل نە قىلعان شەكتەن شىعۋ؟»، - دەگەن حالىقتىڭ بازىناسىنا قالاي جاۋاپ بەرەمىز؟! بۇدان باسقا، «ءۇشقوڭىر» ۇستىرتىندە «Steppe AgroMeat» ، Breeding Company» سياقتى ەكى-ءۇش كومپانيا 13597 گ ا جەردى ءالى كۇنگە دەيىن ماقساتسىز پايدالانىپ وتىرعانى انىقتالدى. شۇعىل قايتارۋ كەرەك!»، - دەدى دەپۋتات.
بۇل تۇرعىدا م. تولىقباي الماتى وبلىسىنىڭ قاراساي اۋدانىندا بولىپ جاتقان زاڭسىزدىقتارعا باس پروكۋراتۋرا مەن ۇكىمەت شۇعىل نازار اۋدارىپ، ارنايى كوميسسيا قۇرىپ، جوعارىدا اتالعان ماسەلەلەرگە ءتيىستى قۇقىقتىق باعا بەرۋى ءتيىس ەكەنىن ايتتى.
