ءۇشارال-دوستىق تراسساسى اقىلى جولدار قاتارىنا كىرۋى مۇمكىن
تالدىقورعان. KAZINFORM - كولىك مينيسترلىگى رەسپۋبليكالىق ماڭىزى بار ءۇشارال-دوستىق اۆتوجولىن اقىلى نەگىزدە پايدالانۋ تۋرالى بۇيرىق ازىرلەپ، قوعام تالقىسىنا شىعاردى.

جاڭا بۇيرىقتىڭ جوباسى «اشىق ن ق ا» پورتالىنا جاريالاندى.
مينيسترلىكتەگىلەردىڭ ۇسىنعان مالىمەتىنە سۇيەنسەك، 184 شاقىرىمدىق رەسپۋبليكالىق ماڭىزى بار ءۇشارال-دوستىق اۆتوجولى اقىلى بولسا، جينالعان قاراجات تولەم الىنعان جولدىڭ كۇتىمىنە جانە قىزمەت كورسەتۋ ساپاسىن جاقسارتۋعا باعىتتالادى. الايدا تولەم جاساۋ جۇرگىزۋشىلەردىڭ بارىنە بىردەي مىندەتتى ەمەس.
- ءۇشارال-دوستىق تاس جولىن اقىلى نەگىزدە پايدالانۋ جوسپارلانىپ وتىر. جەڭىل كولىكتەر ءۇشىن جول اقىسى الىنبايدى. ال جۇك كولىكتەرىنىڭ كلاسىنا بايلانىستى 1240 تەڭگەدەن 6250 تەڭگەگە دەيىن اقى الىنادى. ەگەر جۇرگىزۋشى الدىن الا تولەم جاسايتىن بولسا، جەڭىلدىكتەر قاراستىرىلعان. رەسپۋبليكالىق ماڭىزى بار اۆتوموبيل جولدارىنا تولەمدى ەنگىزۋدەگى ماقسات ونى دامىتۋعا سالىنعان قاراجاتتى ساقتاپ قالۋ ءۇشىن، نورماتيۆتىك جانە ساپالىق كۇتىمىن قامتاماسىز ەتۋ ءۇشىن. اقىلى جولدارداعى تاريف قۇنىنىڭ ءوسۋى ولاردىڭ كۇتىمىن قارجىلاندىرۋ ءۇشىن قاجەتتى نورماتيۆكە قول جەتكىزۋدى ەسكەرە وتىرىپ ەسەپتەلگەن، - دەدى ق ر كولىك مينيسترلىگىنىڭ باسپا ءسوز قىزمەتى.
ايتا كەتەيىك، ءۇشارال-دوستىق اۆتوجولى ەلىمىزدى قىتاي حالىق رەسپۋبليكاسىمەن بايلانىستىرادى.
ەسكە سالايىق، وسىعان دەيىن «قازاۆتوجول» جولدىڭ تايعاقتىعىنا شاعىمدانعان جۇرگىزۋشىلەرگە جاۋاپ بەرگەنىن جازعانبىز.