ءشامشى قالداياقوۆتىڭ كەلىنى تەاتردى سوتقا بەرەتىنىن ايتتى

استانا. قازاقپارات - ءشامشى قالداياقوۆتىڭ كەلىنى بوتاگوز قالداياقوۆا ماجىلىستەگى كوميتەت وتىرىسىندا قايىن اتاسىنا قاتىستى بەلگىلى سپەكتاكل جەلىسى شىندىققا سايكەس كەلمەيتىنىن ايتتى.

ءماجىلىستىڭ الەۋمەتتىك-مادەني دامۋ كوميتەتىندە «كرەاتيۆتى يندۋستريانى دامىتۋ» تاقىرىبىندا وتىرىس ءوتتى. ءسوز العانداردىڭ ءبىرى - كورنەكتى سازگەر قالداياقوۆتىڭ كەلىنى.

«ەلىمىزدىڭ تەاترلارىندا جيىرما جىلدان اسا ۋاقىت بويى «سىعان سەرەناداسى» پەساسى قويىلىپ جاتىر، مۇراگەرلەردىڭ رۇقساتىنسىز. مۇراگەرلەر بىرنەشە مارتە ول جەردە ايتىلعان وقيعا، ءشامشى قالداياقوۆتىڭ سىعانداردان تاياق جەگەنى شىندىققا جاناسپايتىنىن ايتتى. وسى جەردە وتىرعان تەاتر ديرەكتورلارىنا سوڭعى مۇمكىندىك بەرەمىن. ەكى اپتادان كەيىن ولاردى سوتقا بەرەمىن»، - دەدى ول.

بۇل تاقىرىپ بۇعان دەيىن بىرنەشە رەت كوتەرىلگەنىمەن، ءالى كۇنگە دەيىن شەشىمىن تاپپادى. ءشامشى قالداياقوۆتىڭ مۇراگەرلەرى بۇل تۋىندىنىڭ جەلىسىن شىندىققا سايكەس كەلمەيدى دەپ سىناپ، بىرنەشە رەت نارازىلىق بىلدىرگەن. اسىرەسە، بۇعان دەيىن دە پەساداعى كومپوزيتوردىڭ سىعانداردان تاياق جەگەنى تۋرالى ەپيزودتىڭ ويدان شىعارىلعانى جانە ونىڭ بەدەلىنە نۇقسان كەلتىرەتىنى ايتىلعان ەدى.

ءشامشى قالداياقوۆ - قازاق مۋزىكاسىنىڭ التىن ءداۋىرىن قالىپتاستىرعان كورنەكتى تۇلعا. ونىڭ ەسىمى تەك ۇلتتىق مادەنيەتتىڭ سيمۆولى ەمەس، ۇلت رۋحانياتىنىڭ بيىك شىڭى رەتىندە دە باعالانادى. مۇراگەرلەردىڭ مالىمدەمەسى اۆتورلىق قۇقىق پەن مادەني مۇرانى قورعاۋ ماسەلەسىنىڭ وزەكتىلىگىن ايقىن كورسەتىپ وتىر.

 Massaget.kz