ءۇش كۇننەن بەرى تىكۇشاقپەن ىزدەپ تابا الماعان قاراعاندىلىق مالشى تابىلدى
قاراعاندى. KAZINFORM - قاراعاندى وبلىسىندا قاردا جۇرەتىن كولىكپەن جىلقى ىزدەپ كەتكەن جىلقىشى تابىلدى.
14- اقپاندا ءۇش باقتاشى جوعالعان جىلقىلاردى ىزدەۋ ءۇشىن مال شارۋاشىلىعىنان شىعىپ كەتكەن. ولار قاردا جۇرەتىن كولىكپەن جولعا شىققان.
سول كۇنى كۇن باتقانشا ەكەۋى جۇمىس ورىنىنا قايتىپ كەلسە، ءۇشىنشىسى كەلەسى كۇننىڭ تۇنىندە دە ۇيىنە ورالماعان.
وسى ۋاقىتقا دەيىن ونىڭ جانارمايى تاۋسىلىپ قالدى نە بولماسا قارلى بوراندا كەرى جولدى تابا الماي قالۋى مۇمكىن ەدى.
37 جاستاعى مالشىنى ارىپتەستەرى مەن تۋىستارى وزدەرى ىزدەپ، كەيىن پوليتسياعا حابار بەرگەن.
حابار العان ساتتەن نۇرا اۋداندىق پوليتسيا ءبولىمىنىڭ قىزمەتكەرلەرى ىزدەۋ جۇمىسىنا قوسىلدى.
ەر ادامنىڭ تولىق سيپاتتاماسى بار باعىتتاما وبلىستاعى بارلىق پوليتسيا بولىمدەرىنە جانە جاقىن ماڭداعى وبلىستارعا جىبەرىلدى.
كەشە پوليتسەيلەر ونى ىزدەۋگە توتەنشە جاعدايلار مينيسترلىگىنىڭ تىكۇشاعىن ەكى رەت اتتاندىردى، ءبىراق ناتيجە بولمادى.
جاياۋ ىزدەگەننەن دە ەشتەڭە شىقپادى.
ال، وبلىستا اۋا تەمپەراتۋراسى مينۋت سايىن تومەندەپ، قارلى بورانمەن قوسا، دالاداعى اياز كۇشەيە ءتۇستى.
مالشىنى تىرىدەي تابامىز دەگەن ءۇمىت مينۋت ساناپ ءسونىپ بارا جاتتى.
بۇگىن ۋچاسكەلىك ينسپەكتور بەكزات شوكەمبايەۆتان اۋىل تۇرعىنىنىڭ تابىلعانى تۋرالى اقپارات كەلىپ ءتۇستى.
جوعالعان ازامات ءوز اۋىلىنان 120 شاقىرىم جەردە، ياعني قاراعاندى مەن ۇلىتاۋ وبلىستارىنىڭ شەكاراسىنداعى قىستاقتا بولعان.
جاعدايى ءبىرقالىپتى. قازىرگى ۋاقىتتا ونى ۇيىنە جەتكىزىپ جاتىر.
