ءۇش كۇن ىشىندە 30 دان استام قارۋ جاسىرىلعان جەر انىقتالدى

استانا. KAZINFORM - ىشكى ىستەر مينيسترلىگى ەل اۋماعىندا «قارۋ» جەدەل- پروفيلاكتيكالىق ءىس- شاراسىن وتكىزدى.

- ءۇش كۇن ىشىندە 30 دان استام قارۋ جاسىرىلعان جەر انىقتالىپ، 360 ءتۇرلى اتىس قارۋ، 12 گراناتا جانە ءۇش مىڭنان استام وق- ءدارى تاركىلەندى. سونىمەن قاتار بۇرىن ۇرلانعان جەتى قارۋ انىقتالدى، ونىڭ تورتەۋى قاڭتار وقيعاسى كەزىندە ۇرلانعان. بۇدان بولەك، بۇرىن جوعالعان التى قارۋ تاركىلەنىپ، 14 قارۋ ەرىكتى تۇردە تاپسىرىلدى، - دەدى ءى ءى م كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ.

Polisia.kz- ءتىڭ مالىمەتىنشە شارا بارىسىندا اتىس قارۋىن زاڭسىز ساقتاۋ جانە الىپ ءجۇرۋدىڭ 120 فاكتىسى انىقتالىپ، 200 ادام اكىمشىلىك جاۋاپكەرشىلىككە تارتىلدى.

- ىشكى ىستەر مينيسترلىگى ازاماتتارعا قارۋدى كەز كەلگەن ۋاقىتتا ەرىكتى تۇردە تاپسىرۋ مۇمكىندىگى بار ەكەنىن جانە بۇل ءۇشىن ەشقانداي قۇقىقتىق سالدار بولمايتىنىن ەسكە سالادى، - دەلىنگەن حابارلامادا.

ايتا كەتەلىك بىرنەشە وبلىستا قاڭتار وقيعاسى كەزىندە ۇرلانعان قارۋ-جاراقتار تابىلعان ەدى.